युरोपको सर्वाधिक ठुलो क्लब फुटबल प्रतियोगिता च्याम्पियन्स लिगमा आज (मङ्गलबार) अन्तिम १६ अन्तर्गत दोस्रो लेगका दुई खेलहरू हुँदै छन् ।
च्याम्पियन्स लिगअन्तर्गत आज हुने दुवै खेल नेपाली समयअनुसार राति १ः४५ बजेबाट सुरु हुने छन् ।
आजको खेलमा इङ्ग्लिस क्लब म्यानचेस्टर युनाइटेड र स्पेनिस च्याम्पियन एथ्लेटिको मड्रिडले प्रतिस्पर्धा गर्दै छ ।
यो खेल इङ्ग्ल्यान्डस्थित ओल्ड ट्राफोर्डमा हुने छ ।
यो खेलमा दुवै टोली एकअर्कामाथि जित निकाल्दै क्वार्टरफाइनलमा स्थान बनाउने योजनामा छन् ।
यसअघि एथ्लेटिकोको मैदानमा भएको पहिलो लेगको खेलमा दुवै टिमले १–१ गोलको बराबरी खेलेका थिए ।
यसैले आजको खेलमा जित निकाल्ने टिम अघिल्लो चरणमा प्रवेश गर्ने छ ।
एथ्लेटिकोविरुद्ध पोर्चुगिज स्टार क्रिस्टियानो रोनाल्डोले खेल्ने सम्भावना छ ।
युनाइटेडका स्ट्राइकर रोनाल्डोको एथ्लेटिकोविरुद्ध तथ्याङ्क उत्कृष्ट छ ।
रोनाल्डोले एथ्लेटिकोविरुद्ध ३६ खेल खेल्दा ३० गोलमा योगदान दिएका छन् ।
उनले एथ्लेटिकोविरुद्ध २५ गोल र पाँच असिस्ट गरेका छन् ।
रोनाल्डो सम्मेलित टोलीले एथ्लेटिकोलाई १६ पटक हराएको छ भने १० पटक बराबरी खेलेको छ ।
यस्तै, नौ खेलमा भने रोनाल्डोको टिमले हार बेहोरेको छ ।
अनि रोनाल्डो सम्मेलित रियलले सन् २०१४ र २०१६ गरी दुई पटक च्याम्पियन्स लिगको फाइनलमा पुगेर एथ्लेटिकोलाई हराउँदै उपाधि जितेको छ ।
सन् २०१० मा ला लिगाअन्तर्गत रियल मड्रिडले एथ्लेटिकोलाई २–० गोलले हराउँदा रोनाल्डोले पहिलो पटक एथ्लेटिकोविरुद्ध खेलेका थिए ।
त्यसयता उनले एथ्लेटिकोको पोस्टमा चार पटक ह्याट्रिक गोल गरिसकेका छन् ।
यसैले पनि प्रशिक्षक राल्फ राङ्गनिकले उनलाई प्लेइङ सेटमै राख्ने सम्भावना रहेको छ ।
३७ वर्षीय रोनाल्डोले अघिल्लो खेलमा पनि ह्याट्रिक गर्रदे सनसनी मच्चाएका कारण प्रशिक्षक उनको प्रदर्शनबाट लोभिएका छन् ।
रोनाल्डोको ह्याट्रिक गोलको सहायतामा इङ्ग्लिस प्रिमियर लिगमा म्यानचेस्टर युनाइटेडले टोटनह्याम हटस्परमाथि जित दर्ता गरेको थियो ।
शनिबार राति घरेलु मैदानमा युनाइटेडले टोटनह्यामलाई ३–२ गोलले हराएको हो ।
यस्तै आजको अर्को खेलमा नेदरल्यान्ड्सको आयाक्सले पोर्चुगलको बेन्फिकासँग खेल्दै छ ।
अघिल्लो लेगमा २–२ गोलको बराबरी खेलेका कारण दोस्रो लेगमा जित निकाल्ने टोली अन्तिम आठमा पुग्ने छ ।
यो पनि :
