पोर्चुगिज स्टार क्रिस्टियानो रोनाल्डोको सानदार ह्याट्रिकको सहयोगमा म्यानचेस्टर युनाइटेडले जित दर्ता गरेको छ ।
इङ्ग्लिस प्रिमियर लिग फुटबलअन्तर्गत शनिबार राति भएको खेलमा म्यानचेस्टर युनाइटेडले टोटनह्याम हटस्परलाई ३-२ गोलले पराजित गरेको हो ।
ओल्ड ट्राफोर्डमा युनाइटेडलाई जिताउन रोनाल्डोले ह्याट्रिक गोल गरे भने टोटनह्यामका ह्यारी केनले एक गोल गरे ।
टोटनह्यामले एउटा आत्मघाती गोल उपहारमा पाएको थियो ।
युनाइटेडका ह्यारी मगवायरले आफ्नै पोस्टमा गोल गरेका थिए ।
रोनाल्डोले १२औं मिनेटमा सुरुआति गोल गरेका थिए ।
तर खेलको ३५औं मिनेटमा टोटेहमका ह्यारी केनले खेललाई बराबरी गरेका थिए ।
फेरि रोनाल्डोले ३८औं मिनेटमा अग्रता बनाए ।
युनाइटेडकै मगवायरले आत्मघाती गोल गरेपछि खेल बरबरी भएको थियो ।
रोनाल्डोले ८१औं मिनेटमा युनाइटेडको लागि विजयी गोल गर्दै जित दिलाए ।
३७ वर्षीय रोनाल्डोको दोस्रो पटक युनाइटेड फर्किएपछिको यो पहिलो ह्याट्रिक हो ।
उनी यसै सिजन इटालियन क्लब युभेन्टसबाट इङ्ग्ल्यान्ड फर्किएका हुन् ।
जितसँगै युनाइटेड शीर्ष चारमा उक्लिएको छ । उसले २९ खेलमा ५० अङ्क जोडेको छ ।
पराजित टोटनह्याम ४५ अङ्कका साथ सातौँ स्थानमा छ । उसले २७ खेल खेलेको छ ।
यस्तै, गएराति भएको अर्को खेलमा लिभरपुलले सहज जित निकाल्यो ।
लिभरपुलले ब्राइटनलाई २-० गोल अन्तरले हराएको हो ।
लिभरपुललाई जित दिलाउन लुइस डियाज र मोहमद सलाहले एक एक गोल गरे ।
खेलको १९ औं मिनेटमा डियाजले गोल गर्दै लिभरपुललाई सुरुआती अग्रता दिलाएका थिए ।
त्यसपछि खेलको ६१ औं मिनेटमा सलाहले पेनाल्टीमा गोल गर्दै लिभरपुललाई २-० को जित दिलाए ।
जितसँगै लिभरपुलले शीर्ष स्थानको म्यानचेस्टर सिटीमाथि उपाधि होडमा चुनौती थपेको छ ।
उसले सिटीसँगको अग्रता तीन अङ्कमा झारेको छ ।
लिभरपुलले २८ खेलमा ६६ अङ्क जोडेको छ ।
सिटीसँग समान खेलमा ६९ अङ्क छ ।
पराजित ब्राइटन भने ३३ अङ्कका साथ १३औँ स्थानमा छ ।
अर्को खेलमा ब्रेन्टफर्डले बर्नलीमाथि २-० गोलको जित हात पारेको छ ।
ब्रेन्टफर्डको जितमा इभान टोनीले दुवै गोल गरे ।
बर्नलीका नाथन कोलिन्सले रातो कार्ड पाउँदै मैदान छोडेका थिए ।
यो पनि :
युरोपा लिग : घरेलु मैदानमा बार्सिलोना गालातासारेसँग रोकियो, सेभिल्लाको सहज जित
