रुसी सेनाले आज (शुक्रबार) युक्रेनको नयाँ तीन सहरमा आक्रमण गरेका छन् ।
दुई फरक दिशामा रहेका, लुट्स, नीप्रो र इभानो-फ्रान्किभिस्क सहरमा आक्रमण भएको भन्दै युक्रेनले तस्बिर समेत सार्वजनिक गरेकाे छ ।
विभिन्न अन्तर्राष्ट्रिय सञ्चारमाध्यमले आक्रमण सत्य भएकाे भन्दै समाचार सम्प्रेषण गरिरहेका छन् ।
उत्तर-पश्चिममा रहेको लुट्स र मध्य-पूर्वमा रहेको नीप्रो सहरमा विस्फोट भएको छ । नीप्रोमा तीन स्थानमा विस्फोट भएको बताइएको छ ।
युक्रेनले नीप्रोमा भएका विस्फोटका केहि तस्बिरहरू समेत सार्वजनिक गरेको छ ।
लुट्समा रहेको वायुसेनाको विमानस्थल र लडाकु विमान मर्मत गर्ने कारखानामा आक्रमण गरिएको हो ।
लुट्सका नगरप्रमुखले विस्फोट भएको पुष्टि गर्दै सबैलाई सुरक्षित स्थानमा बस्न आग्रह गरेका छन् ।
साथै, नागरिकलाई आफ्नो तस्बिर, ठेगाना र अन्य विवरण प्रकाशन नगर्न उनले अनुरोध गरेका छन् ।
रुसले अर्को पश्चिमी सहर इभानो-फ्रान्किभिस्कमाथि आक्रमण गरेको रुसी रक्षा मन्त्रालयले पुष्टि गरेको छ ।
इभानो-फ्रान्किभिस्कका नगरप्रमुखले समेत फेसबुक पोस्टमा आक्रमणको पुष्टि गरेका हुन् । यी तीन सहरमा यसअघि आक्रमण भएको थिएन ।
आक्रमण परी एक जनाकाे मृत्यु भएकाे अल्जाजीराले उल्लेख गरेकाे छ ।
युक्रेनकाे राजधानी कीभलाई नियन्त्रणमा लिन प्रयास गरिरहेकाे रूसले आफ्ना आक्रमणलाई सशक्त बनाउदै लगिरहेकाे छ ।
पूर्वी युक्रेनमा रहेका रुसी समर्थित सेनाहरूलाई रुसी राष्ट्रपति भ्लादिमिर पुटिनले स्वास्थ्य उपचार, खाद्यान्न र हतियार लगायतकाे सहयाेग दिइरहेका छन् ।
रुस समर्थित सहरका प्रमुखकाे अनुराेधमा भन्दै भ्लादिमिर पुटिनले युक्रेनमाथि आक्रमण सुरु गरेका थिए ।
रुसले आक्रमण सुरू गरेयता युक्रेन छाड्ने युक्रेनीकाे सङ्ख्या २५ लाख पुगिसकेकाे छ ।
