एसी मिलान इटालियन सिरी ‘ए’ फुटबलको शीर्ष स्थानमा उक्लिएको छ ।
आइतबार राति भएको खेलमा नापोलीलाई १-० गोलअन्तरले हराउँदै मिलान शीर्ष स्थानमा उक्लिएको हो ।
नापोलीको मैदानमा भएको खेलमा मिलानलाई जिताउन ओलिभर जिरुड नायक बने ।
उनले नै मिलानको जितमा निर्णायक गोल गरे ।
पहिलो हाफ गोलरहित बराबरीमा सकिएको उक्त खेलको ४९औँ मिनेटमा उनले गोल गरेका थिए ।
मिलानको जितसँगै सिरी ‘ए’को उपाधि होड थप रोमाञ्चक बनेको छ ।
जारी सिजन मिलान, इन्टर मिलान र नापोली तीनै टिम उपाधि होडमा छन् ।
मिलान २८ खेलमा ६० अङ्क बनाउँदै शीर्ष स्थानमा छ ।
इन्टर ५८ अङ्कका साथ दोस्रो स्थानमा छ । उसले २७ खेल खेलेको छ ।
नापोली २८ खेलमा ५७ अङ्क जोड्दै तेस्रो स्थानमा छ ।
गएराति नै भएको अर्को खेलमा युभेन्टसले स्पेजियामाथि साँघुरो जित निकालेको छ ।
आइतबार राति घरेलु मैदानमा भएको खेलमा युभेन्टसले स्पेजियामाथि १–० गोलको जित निकालेको हो ।
युभेन्टसको जितमा अल्भारो मोरटाले निर्णायक गोल गरे ।
उनको खेलको २१औँ मिनेटमा गरेको गोल नै युभेन्टसको जितमा निर्णायक बनेको हो ।
जितसँगै चौथो स्थानमा रहेको युभेन्टसले २८ खेलमा ५३ अङ्क जोडेको छ ।
स्पेजिया भने २६ अङ्कका साथ १६औँ स्थानमा छ ।
गएराति नै भएको अर्को खेलमा सासुलोले भेनेजियालाई ४-१ गोल अन्तरले हरायो भने अर्को खेलमा टोरिनो र बोलोग्नाले गोलरहित बराबरी खेले ।
यस्तै, अर्को खेलमा टोरिनो र भेरोनाले १-१ गोलको बराबरी खेल्दै अङ्क बाँड्दा अर्को खेलमा जेनाेआ र इम्पोली गोलरहित बराबरीमा रोकिए ।
यो पनि:
