इङ्ग्लिस प्रिमियर लिगअन्तर्गत ‘म्यानचेस्टर डर्बी’ मा म्यानचेस्टर सिटीले सानदार जित निकालेको छ ।
आइतबार राति भएको म्यानचेस्टर डर्बीमा केभिन डे ब्रुयने र रियाद मेहरेज चम्किएपछि पूरा समय खेल पकड राख्दै सिटीले युनाइटेडमाथि ४-१ अन्तरको जित निकालेकाे हाे ।
सिटीको घरेलु मैदान इतिहादमा भएको खेलमा सिटीको जितमा ब्रुयने र मेहरेजले दुई–दुई गोल गरे ।
युनाइटेडका जाडोन सान्चोको गोल सान्त्वना बन्यो ।
पहिलो हाफमा २-१ ले अग्रता बनाएको सिटीले दोस्रो हाफमा थप दुई गोल गर्दै शीर्ष स्थानमा पकड बलियो बनायो ।
ब्रुयनले खेलको पाँचौ मिनेटमा गोल गर्दै सिटीको अग्रता बनाए ।
जाडोन सान्चोले २२औँ मिनेटमा गोल गर्दा भ्रमणकारी टोली युनाइटेड खेलमा फर्कियो ।
२८औँ मिनेटमा पुनः केभिनले गोल गर्दै दोस्रो पटक अग्रता लिए ।
यसपछि खेलको ६८ र ९०औँ मिनेट रियादले गोल गरेपछि सिटीले प्रभावशाली जित निकाल्यो ।
यस खेलमा युनाइटेडले आफ्ना स्टार स्ट्राइकर क्रिस्टियानो रोनाल्डोलाई खेलाएको थिएन ।
प्रशिक्षक राल्फ राङनिकले उनलाई टोलीमै राखेनन् ।
जितसँगै सिटीले पुनः तीन अंकको अग्रता लिएको छ । २८ खेल खेलेको सिटी ६९ अंकसहित शीर्ष स्थानमा छ । एक खेल कम खेलेको लिभरपुल ६३ अंकसहित दोस्रो स्थानमा छ ।
जितसँगै सिटीले शीर्षता कायमै राखेको छ ।
सिटी २८ खेलमा ६९ अङ्क जोडेर शीर्ष स्थानमा छ ।
पराजित युनाइटेड भने पाँचौँ स्थानमा खस्किएको छ ।
उसले २८ खेलमा ४७ अङ्क जोडेको छ ।
आइतबार राति नै भएको अर्को खेलमा घरेलु टोली वाट्फोर्डमाथि ३-२ अन्तरको रोमाञ्चक जित निकाल्दै आर्सनल शीर्ष चारमा उक्लियो ।
गएराति आर्सनललाई जिताउन मार्टिन ओडेगार्ड, बुकायो साका र ग्राबियल मार्टिनेलीले एक–एक गोल गरे । वाटफोर्डका चुचो हर्नान्डेज र मौसा सिसोकोले एक–एक गोल गरे ।
आर्सनलले म्यानचेस्टर युनाइटेडलाई उछिन्दै शीर्ष चारमा आफ्नो स्थान कब्जा गरेको हो ।
जितसँगै चौथो स्थानमा उक्लिएको आर्सनलले २५ खेलमा ४८ अङ्क बनायो । वाटफोर्ड भने १९ अङ्कका साथ १९औँ स्थानमा छ ।
प्रिमियर लिगको शीर्ष चारको होड रोमाञ्चक छ । आर्सनल, युनाइटेड, वेस्ट ह्याम र टोटनह्याम शीर्ष चारका लागि प्रतिस्पर्धा गरिरहेका छन् ।
यो पनि :
