युक्रेनबाट पाठ सिक्नुपर्ने भन्दै राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले नेपालका सबै राजनीतिक दलहरुलाई समयमा नै सचेत रहन आग्रह गरेका छन् ।
पछिल्लो समय वैदेशिक सम्बन्धलाई नेपालका राजनीतिक पार्टीहरुले सत्तारोहणको सिढी मात्रै बनाएकोतर्फ इङ्गित गर्दै अध्यक्ष लिङ्देनले यस्तो बताएका हुन् ।
बुधबार राप्रपाको केन्द्रीय कार्य समितिको बैठकलाई सम्बोधन गर्दै अध्यक्ष लिङ्देनले नेपालका प्रमुख राजनीतिक दलहरुले वैदेशिक सम्बन्धनलाई सत्तारोहणको सिढी बनाएको र त्यसले नेपालको शक्ति नियन्त्रण र सन्तुलन नै ध्वस्त भएको भन्दै आक्रोश व्यक्त गरे ।
‘जनताले सरकारको अनुभूति गर्न पाएका छैनन्, देशको अर्थतन्त्र कमजोर छ, बेरोजगारी व्याप्त छ । सँगै राजनीतिक दल वैदेशिक सम्बन्धलाई सत्तामा पुग्न प्रयोग गरिरहेका छन्’ अध्यक्ष लिङ्देनले भने, ‘यसले नेपाललाई गम्भिर सङ्कटतर्फ धकेलिरहेको छ । हाम्रो वैदेशिक सम्बन्ध खल्बलिन पुगेको छ । वैदेशिक नीतिमा नै असन्तुलन देखिएको छ, जुन सामान्य होइन ।’
वैदेशिक नीतिमा असन्तुलन आउँदा नेपाल शक्ति राष्ट्रहरुको रणनीतिक प्रतिस्पर्धास्थलमा परिणत भएको उनले बताए ।
‘सत्तापक्ष र प्रमुख राजनीतिक दलहरुका क्रियाकलापका कारण हुने नोक्सानीको मुल्य केवल सम्बन्धित राजनीतिक दल र नेताले मात्रै चुकाउनु पर्दैन’ देशको अवस्थामा चिन्ता व्यक्त गर्दै अध्यक्ष लिङ्दनेले भने, ‘यसको भार सिङ्गो मुलुकले बेहोर्नुपर्नेछ । अहिले देश त्यही बाटोतर्फ उन्मुख छ । समयमा नै सचेत बनौँ ।’
युक्रेनमाथि रुसले गरेको आक्रमणको भत्सर्ना गरेका उनले नेपाललाई भविष्यको युक्रेन बन्नबाट रोक्नतर्फ सङ्केत गरेका छन् ।
सोही बैठकमा नै अध्यक्ष लिङ्देनले देशका प्रमुख राजनीतिक दल र नेताप्रति जनताको विश्वास मर्दै गएको समेत बताएका छन् ।
नेपाललाई अब काङ्ग्रेस र कम्युनिष्टको विकल्प आवश्यक परिरहेको र सबैभन्दा राम्रो विकल्प राप्रपा मात्रै रहेको दाबी गर्दै लिङ्देनले राप्रपालाई निर्णायक शक्ति बन्न सहयोग गर्न आग्रह समेत गरे ।
राप्रपाको केन्द्रीय कार्य समिति बैठक बुधबारदेखि सुरु भएको छ । बैठकमा अध्यक्ष राजेन्द्र लिङ्देन, उपाध्यक्ष एवम् सचिवालय प्रमुख हेमजंग गुरुङ र महामन्त्री एवम् स्थानीय तह निर्वाचन परिचालन समितिका संयोजक भुवन पाठकले प्रस्तुत गरेका प्रतिवेदनमाथि छलफल प्रारम्भ गरिएको छ ।
