नक्कली शैक्षिक प्रमाणपत्र मुद्दामा राष्ट्रिय फुटबल टिमका पूर्वकप्तान हरि खड्का दोषी ठहर भएका छन् ।
आज विशेष अदालतका न्यायाधीशहरु अब्दुल अजिज मुसलमान र नित्यानन्द पाण्डेको इजलासले नेपाल प्रहरीमा बढुवा प्रयोजनका लागि खड्काले पेस गरेको प्रमाणपत्र नक्कली भएको ठहर गरेको हो ।
अदालतले पूर्वकप्तान खड्कालाई पाँच हजार जरिवानासमेत तोकेको छ ।
प्रहरी सहायक निरीक्षक (असई) पदमा नियुक्ति लिन खड्काले माध्यमिक शिक्षा परिषद् बाराणशी, उत्तरप्रदेशबाट जारी भएको प्रविण प्रमाणपत्र तह (आईए)को झुटो प्रमाणपत्र पेश गरेको ठहर भएको छ ।
खड्का २०५९ साल पुस १४ गते प्रहरी नायब निरीक्षक पदमा बढुवा भएका थिए ।
राष्ट्रिय खेलकुद परिषद्का सदस्यसमेत रहेका खड्का अहिले सेवानिवृत्त भइसकेका छन् ।
राष्ट्रिय खेलकुद परिषद्का सदस्यसमेत रहेका खड्कालाई गत वर्ष मन्त्रिपरिषद् बैठकले राखेपको सदस्यमा नियुक्त गरेको थियो ।
खड्काले सन् २००३ देखि २००६ सम्म नेपाल पुलिस क्लबबाट व्यवसायीक फुटबल खेलेका थिए ।
खड्काले पुलिस फुटबल टिममा ६ वर्षसम्म व्यवस्थापकीय भूमिका निर्वाह गरेका थिए । प्रमाणपत्रको विवाद आएपछि उनले राजीनामा दिएका थिए ।
त्यसपछि नेपाली राष्ट्रिय महिला टाेलीकाे प्रमुख प्रशिक्षककाे भूमिका समेत निर्वाह गरिसकेका खड्का नेपालका लागि अन्तर्राष्ट्रिय फुटबलमा सर्वाधिक गाेल गर्ने खेलाडी समेत हुन् ।
उनी र निराजन रायमाझीले नेपालका लागि समान १३ गाेल गरेका छन् ।
सन् १९९५ देखि २००६ सम्म नेपाली जर्सिमा मैदानमा देखिएका खड्काले ४१ खेलमा १३ गोल गरेका हुन् । उनकाे साे कीर्तिमान हालसम्म पनि कसैले ताेड्न सकेका छैनन् ।
शैक्षिक प्रमाणपत्रबारे विवादीत भएपछि खड्काले राजीनामा दिएपनि अख्तियारले छानबिन गरेर २०७८ माघ १२ गते विशेष अदालतमा मुद्दा दायर गरेको थियो ।
अख्तियारले मुद्दा दायर गरेपछि खड्काले आफ्नो प्रमाणपत्र झुटो नभएको भन्दै खण्डन समेत गरेका थिए ।
तर अदालतले आज दोषी ठहर गरेपछि भने हालसम्म खड्काले कुनै पनि औपचारिक प्रतिक्रिया दिएका छैनन् ।
