नक्कली शैक्षिक पत्र पेश गरी प्रहरीमा जागिर खाएको आरोपसहित कीर्तिमानी फुटबल खेलाडी हरि खड्काविरुद्ध विशेष अदालतमा मुद्दा दायर भएको छ ।
नेपाली राष्ट्रिय पुरुष फुटबल टोली पूर्व कप्तान खड्काविरुद्ध अख्तियार दुरुपयोग अनुसन्धान आयोग (अदुअआ)को टोलीले बुधबार विज्ञप्ति जारी गर्दै मुद्दा दायर गरिएको जनाएको हो ।
अदुअआद्वारा जारी विज्ञप्तिमा भनिए अनुसार खड्काले पेश गरेको माध्यमिक तहको शैक्षिक प्रमाणपत्र फर्जी रहेको खुल्न आएको हो ।
भारत, उत्तरप्रदेशबाट जारी भएको खड्काको शैक्षिक योग्यता (आइएको) नक्कली भएको अदुअआको दाबी रहेको छ ।
आरोपित खड्का सोही शैक्षिक प्रमाणपत्र पेश गरेर २०५५ कार्तिक १ गते खुला प्रतिस्पर्धाबाट प्रहरी सहायक निरीक्षक (असई) मा नियुत्त भएका थिए ।
२०५९ पुस १४ गते प्रहरी नायब निरीक्षक पदमा बढुवा भएका खड्का महानगरीय प्रहरी गण नम्बर २ मा दरबन्दी भई राष्ट्रिय प्रहरी प्रशिक्षण प्रतिष्ठानमा केन्द्रीय खेलकुद गतिविधिमा कार्यरत थिए ।
हाल प्रहरी सेवाबाट सेवानिवृत भइसकेका खड्काले सन् २००३ देखि २००६ सम्म नेपाल पुलिस क्लबबाट व्यवसायीक फुटबल खेलका थिए ।
सोही क्लबको व्यवस्थापकीय भूमिका समेत निर्वाह गरिसकेका आरोपित खड्काले नेपाली महिला राष्ट्रिय टोलीको प्रशिक्षण समेत सम्हालिसकेका छन् ।
मन्त्रिपरिषद् बैठकबाट राष्ट्रिय खेलकुद परिषद् (राखेप) को बोर्ड सदस्यमा समेत नियुक्त भइसकेका खड्का नेपाली खेलकुद जगत्का कीर्तिमानी खेलाडी हुन् ।
नेपाली राष्ट्रिय फुटबल टोलीको जर्सिमा नेपालको प्रतिनिधित्व गरिसकेका खड्काले अन्तर्राष्ट्रिय फुटबलमा नेपालका लागि सर्वाधिक गोल गर्ने दुईमध्ये एक खेलाडी हुन् ।
सन् १९९५ देखि २००६ सम्म नेपाली जर्सिमा मैदानमा देखिएका खड्काले ४१ खेलमा १३ गोल गरेका छन् ।
