शिक्षा, विज्ञान तथा प्रविधि मन्त्रालयले २०७९ सालको नयाँ शैक्षिक सत्रको पठनपाठन आगामी जेठ १ बाट सुरु गर्ने निर्णय गरेको छ ।
मन्त्रालयका प्रवक्ता दीपक शर्माका अनुसार बुधबार बसेको बैठकले भर्नालगायतका प्रक्रिया आगामी वैशाखमा सक्ने निर्णय गरेको हो ।
सो बैठकले नयाँ शैक्षिक सत्रको पठनपाठन जेठ १ बाट थालेर २०७९ साल चैत मसान्तभित्र सक्ने निर्णय गरेको उनको भनाइ छ ।
कोभिडका कारण चालू शैक्षिक सत्रको पठनपाठन गत असारबाट सुरु भएको थियो ।
तर कोरोना सङ्क्रमणको डरले गएको मङ्सिरबाट मात्र भौतिक उपस्थितिमा पठनपाठन हुँदै आएको थियो ।
कोरोना भाइरसको नयाँ भेरियन्ट ओमिक्रोनका कारण शिक्षण संस्था पुनः एक महिना बन्द भएका थिए ।
गत आइतबारबाट पुनः शिक्षण संस्था नियमित भएका छन् ।
विद्यार्थीहरू भाैतिक उपस्थितिमै पढ्न विद्यालय जान थालेका छन् ।
उनले चालू शैक्षिक सत्रको पठनपाठन आगामी चैत मसान्तसम्म जारी राख्ने र आगामी वैशाखमा कक्षा १० सम्मका सबै कक्षाका परीक्षा सञ्चालन गर्ने निर्णय भएको बताए ।
यस्तै, नतिजा सार्वजनिक गर्ने, नयाँ भर्ना प्रक्रिया थाल्ने र पाठ्यपुस्तक व्यवस्थापन गर्ने गरी शैक्षिक योजनालाई मन्त्रालयले स्वीकृत गरेको बताए ।
स्थानीय तहले कक्षा ८ को परीक्षा आफ्नोअनुकूल हुने गरी वैशाखमै सक्नुपर्ने निर्णय भएको उनको भनाइ छ ।
यति बेला जनक शिक्षा सामग्रीले पाठ्यपुस्तक छपाइ धमाधम गरिरहेको छ ।
आगामी शैक्षिक सत्रमा कक्षा ९ को नयाँ पाठ्यक्रम कार्यान्वयनमा ल्याइँदै छ ।
त्यसका लागि अनिवार्य पाँचमध्ये दुई विषयका मात्र पाठ्यपुस्तकको छपाइ रेडी कपी (पीआरसी) जनक शिक्षालाई उपलब्ध गराइएको छ ।
आगामी वैशाखमा हुने स्थानीय तहको निर्वाचनका लागि जनक शिक्षाले नै मतपत्र छाप्नेछ ।
जनक शिक्षाका प्रबन्ध सञ्चालक अनिल झाले मतपत्र छाप्नुपर्ने भए पनि पाठ्यपुस्तक छपाइमा असर नपारिने बताए ।
कतिपय विषयका पिआरसी प्राप्त नभएकाले तिनको प्रतीक्षामा रहेको उल्लेख गर्दै जनक शिक्षाका प्रबन्ध सञ्चालक झाले समयमा प्राप्त भए आगामी वैशाख मध्यसम्ममा पाठ्यपुस्तक छापेर वितरण गरिसक्ने बताए ।
सम्बन्धित समाचारहरू :
त्रिविको बेथिति : नतिजा प्रकाशनमा अचाक्ली ढिलाइ, विद्यार्थीमा मानसिक असर पर्दै
शैक्षिक संस्था खोल्न लगाइएको रोक माघ महिनाभर लम्ब्याउन सिसिएमसीको सिफारिस
