वेस्ट इन्डिजविरुद्धको पहिलो टी२०आईमा भारतले ६ विकेटको जित हात पारेको छ ।
कलकत्तास्थित इडन गार्डेन मैदानमा आजबाट सुरू भएको तीनमध्ये पहिलो टी२०आईमा भारतले टस जितेर फिल्डिङ रोजेको थियो ।
पहिले ब्याटिङ गरेको वेस्ट इन्डिजले निर्धारित २० ओभरमा सात विकेट गुमाएर एक सय ५७ रन बनाएको थियो ।
वेस्ट इन्डिजका लागि निकोलस पोरनले सर्वाधिक ६१ रन जोडेका थिए । पोरनबाहेक काइल मेयर्सले ३१ र किरोन पोलार्डले २४ रन बनाए ।
त्यसबाहेक अन्य खेलाडीको प्रदर्शन भने गतिलो रहेन । वेस्ट इन्डिजले १७ अतिरिक्त रन पाएको थियो ।
वेस्ट इन्डिजलाई मध्य स्कोरमा रोक्न भारतका लागि टी२०आई मा डेब्यू गरेका रवि विश्नोइले दुई विकेट लिए ।
विश्नोइबाहेक हर्सल पट्टेलले दुई, युज्वेन्द्र चाहल, दिपक चाहर र भुवनेश्वर कुमारले समान एक–एक विकेट लिए ।
एक सय ५८ रनको विजयी लक्ष्य पाएको भारतले सात बल अगावै लक्ष्य प्राप्त गर्याे ।
भारतका लागि कप्तान रोहित शर्माले ४० रन जोडे । त्यसबाहेक इशान किशनले ३५ र सूर्यकुमार यादवले नटआउट ३४ रनको योगदान दिए ।
वेन्कटेश अय्यरले टोलीका लागि २४ रनको मद्दत गर्दा विराट कोहलीले १७ रन बनाए । चार रन भने भारतले उपहार पाएको थियो ।
रोस्टन चेसले दुई विकेट लिए पनि टोलीको जितको लागि त्यो पर्याप्त हुन सकेन ।
चेसबाहेक फेबियन एलेन र शेल्डन कोट्रेलले एक–एक विकेट लिँदै भारतको इनिङ ध्वस्त पार्न खाजेका थिए ।
तर निकै सन्तुलित खेल प्रदर्शन गरेको भारतले खेल पूर्ण रुपमा कब्जामा लियो र विजयी भयो ।
भारत भ्रमणमा आएको वेस्ट इन्डिजले अब भारतविरुद्धको दोस्रो टी२०आई फेब्रुअरी १८ र तेस्रो खेल २० फेब्रुअरीमा कलकत्तामा खेल्नेछ ।
