इङ्ग्लिस क्लब चेल्सी एफए कपको पाँचौँ चरणमा प्रवेश गरेको छ ।
शनिबार राति भएको चौथो चरणको खेलमा प्लेमाउथ अर्गिलेमाथि अतिरिक्त समयमा २–१ गोलको जित निकाल्दै चेल्सी अघिल्लो चरणमा प्रवेश गरेको हो ।
स्टाम्फोर्ड ब्रिजमा खेलको निर्धारित समय १–१ गोलको बराबरीमा सकिएको थियो । खेलको आठौँ मनेटमा अर्गिलेका मकाउले गिलेस्फीले गोल गर्दै पाहुना टिमलाई सुरुआती अग्रता दिलाएका थिए ।
४१औँ मिनेटमा केसार एज्पिलिकुएटाले गोल गर्दै चेल्सीलाई बराबरीमा फर्काए । त्यसपछि निर्धारित समय दुवै टिमले गोल गर्न नसक्दा खेल अतिरिक्त समयमा धकेलिएको थियो ।
अतिरिक्त समयको १०५औँ मिनेटमा मार्को एलोन्सोले गोल गर्दै चेल्सीलाई अग्रता दिलाए । ११८औँ मिनेटमा अर्गिलेले बराबरी गर्ने मौका पाएको थियो ।
तर अर्गिलेका रियान हार्डीको प्रहार गोलरक्षक केपा अरिजाबलागाले पेनाल्टी सेभ गरेपछि चेल्सी अघिल्लो चरणमा पुग्न सफल भयो ।
