आयोजक राष्ट्र क्यामरुन र इजिप्ट अफ्रिकी कप अफ नेसन्स (एफकन) २०२१ को फाइनल प्रवेशका लागि आज आमनेसामने हुँदैछन् ।
प्रतियोगिताको दोस्रो सेमिफाइनल अन्तर्गत पल बिया रङ्गशालामा आज राती १२ः४५ बजे यी दुई राष्ट्र भिड्दैछन् ।
आजको सेमिफाइनल भिड्न्त सर्वाधिक एफकनको उपाधि जितेका दुई राष्ट्रबीच हुँदैछ ।
प्रतियोगिताको ३२औं संस्करणमा आइपुग्दा इजिप्टले सर्वाधिक सात पटक र क्यामरुनले पाँच पटक एपकनको उपाधि जितेकाे छ ।
सबैभन्दा सफल राष्ट्रबीच आज हुने भिड्न्त निकै रोमाञ्चक हुनेछ ।
क्वाटरफाइनलमा गाम्बियालाई २–० ले हराउँदै सेमिफाइनलमा आइपुगेको क्यामरुन प्रतियोगिताको अपराजित दुईमध्येको एक टोलीले हो ।
यता क्यामरुनको आजको प्रतिद्वन्द्वी इजिप्ट भने समूहको चरणमा नाइजेरियासँग पराजित भएयता अपराजित रहँदै सेमिफाइनल आइपुगेको हो ।
आजको खेलमा क्यामरुनका भिन्सेन्ट अबुबाकर र इजिप्टका मोहम्मद सलाहबीचको जम्काभेट प्रतिस्पर्धात्मक हुने पक्का छ ।
खेलअघि सलाहका बारेमा टिप्पणी गरेका अबुबाकरले आफू सलाहको खेलको प्रशंसक नभएको बताएका छन् ।
जारी प्रतियोगितामा सर्वाधिक ६ गोल गरेका अबुबाकरले क्यामरुनी टोलीको मुख्य हतियार हुन् ।
यता सलाहले भने इजिप्टलाई पटक–पटक उद्दार गरे पनि प्रतियोगितामा दुई गोल र एक महत्वपूर्ण एसिस्ट मात्र गरेका छन् ।
आज विजयी हुने टोलीले एफकन २०२१ को उपाधि जित्न सेनेगलको सामना गर्नुपर्नेछ । हिजो भएको पहिलो सेमिफाइनलमा बुर्किना फासोलाई ३–१ ले पाखा लगाउँदै सेनेगलले फाइनलमा स्थान बनाइसकेको छ ।
प्रतियोगिताको फाइनल खेल सोमबार पल बिया रङ्गशालामा हुनेछ ।
