फ्रेन्च लिग वानको शीर्ष स्थानमा रहेको पेरिस सेन्ट जर्मन (पिएसजी) फ्रेन्च कप (कप डी फ्रान्स) को अन्तिम १६ बाटै बाहिरिएको छ ।
सोमबार राति भएको अन्तिम १६ को खेलमा ओजिसी निससँग पेनाल्टी सुटआउटमा ६–५ गोलले पराजित भएसँगै पिएसजी बाहिरिएको हो ।
फ्रेन्च कपकै सर्वाधिक सफल क्लब पिएसजी यस पटक भने क्वार्टरफाइनल पुग्न सकेन ।
पिएसजीले हालसम्म १४ पटक फ्रेन्च कपको उपाधि जितेको छ भने पाँच पटक उपविजेतामा सीमित बनेको छ ।
त्यसबाहेक पिएसजीको यो हारसँगै सबै खाले प्रतियोगिता गरी १४ खेलको अपराजित यात्रामा समेत पूर्णविराम लागेको छ ।
सन् २०११ पछि पिएसजीले कोपा डे फ्रान्समा गोल गर्न नसकेको यो पहिलो खेल हो ।
पिएसजी निससँग पछिल्लो आठ भेटमा अपराजित थियो ।
कोभिड १९ सङ्क्रमणपछि टोलीबाट बाहिर रहँदै आएका अर्जेन्टिनी स्ट्राइकर लियोनल मेस्सी सोमबार निसविरुद्धको खेलमा फर्किएका थिए ।
अनि प्रशिक्षक माैरिसयो पोचेटिन्होले किलियन एम्बाप्पेलाई खेल सकिन आधा घण्टा बाँकी हुन्जेल बेन्चमा राखेका थिए ।
उनी बेन्चबाट आएपनि टोलीको हार टार्न सकेनन् ।
खेलको निर्धारित समय गोलरहित बराबरीमा सकिएको थियो ।
त्यसपछि खेल निर्णय पेनाल्टी सुटआउटबाट गरिएको थियो ।
निसका गोलिकिपर मार्सिन बुल्काले पिएसजीका लियानार्दो प्राडेस र जाभी सिमोन्सको प्रहार रोकेपछि टोलीलाई क्वार्टफाइनलको यात्रा तय गराए ।
पेनाल्टीमा पिएसजीका लियोनल मेस्सी, किलियन एम्बाप्पे, जुलियन ड्राक्जलर, मार्को भेराट्टी, जुआन बर्नाटले गोल गरे भने लिएन्द्रो पेरेडेस र जाभी सिमोन चुके ।
यता, नाइसका एन्डी डेलर्टबाहेक अरू सबैको पेनाल्टी प्रहार गोलमा परिणत भएको थियो ।
मोर्गन स्कनेइडेर्लिन, जिन–क्लेएर टोडिबो, युसुफ अटल, एमिने गौइरी, इभान गुएसान्ड र दान्तेले गोल गरेका थिए ।
अब, क्वार्टरफाइनल पुगेको नाइसले सेमिफाइनलका लागि मार्सेइलीको सामना गर्ने छ ।
यससँगै फ्रेन्च कपको क्वार्टरफाइनल समीकरण पनि पूरा भएको छ ।
क्वार्टरफाइनलमा बर्जराक पेरिगड, भर्साइलिस, नान्टेस, बस्टिया मोनाका, एमिनेस, निस र मार्सेली पुगेका छन् ।
सेमिफाइनल प्रवेशका लागि बर्जराक पेरिगडले भर्साइलिससँग खेल्ने छ भने नान्टेसले बस्टियाको सामना गर्ने छ ।
मोनाकाले एमिनेससँग प्रतिस्पर्धा गर्दा निस र मार्सेलीको भिडन्त हुनेछ ।
क्वार्टरफाइनलका सबै खेल ९ फेब्रुअरीमा हुने छन् ।
यो पनि :
स्टार खेलाडीबिनै मैदान उत्रिएको पिएसजी सम्भावित हारबाट जोगियो
