अफ्रिकी कप अफ नेसन्स (एफकन) २०२१ को फरक–फरक क्वाटरफाइनल खेलमा आज चर्चित खेलाडी साडियो माने र मो सलाह प्रतिस्पर्धा गर्दैछन् ।
आज हुने पहिलो क्वाटरफाइनल खेलमा सलाह सम्मिलित इजिप्टले मोरोक्कोसँग प्रतिस्पर्धा गर्दैछ ।
क्यामरुनस्थित अहमदौ अहिजो रङ्गशालामा राती ८ः४५ बजे सुरु हुने खेलमा मोरक्कोलाई पाखा लगाउँदै इजिप्ट सेमिफाइनलमा स्थान पक्का गर्न चाहन्छ ।
सर्वाधिक सात पटक एफकनको उपाधि जितेको इजिप्ट आज केही दबाबमा हुनेछ । तर उसका लागि इंग्लिस क्लब लिभरपुलका फरवार्ड मो सलाह नायक बन्न सक्छन् ।
सलाहलाई मोहम्मद एल्नेनीले मिडफिल्डमा साथा दिँदा इजिप्टको गोलपोस्टको जिम्मेवारी मोहम्मद एल सेनावीले सम्हाल्नेछन् ।
यता कम दबाबका बीच इजिप्टविरुद्ध मैदान उत्रिए पनि मोरोक्को एफकनको विजेताका रुपमा आफ्नो नाम लेखाउन चाहन्छ ।
सन् १९८० मा सम्पन्न १२औं संस्करणको एफकनमा तेस्रो र २००४ मा प्रतियोगिताको उपविजेता बनेको मोरोक्को यसपटक इतिहास लेख्ने दाउमा हुनेछ ।
इजिप्टका लागि आजको खेलमा मोरोक्कोका गोलरक्षक यासिन बोनोउ बाधक बन्न सक्छन् ।
स्पेनिस क्लब सेभिल्लाबाट व्यवसायीक फुटबल खेलिरहेका बोनोउबाहेक पेरिस सेन्ट जर्मेनका डिफेन्डर आर्चिफ हाकिमीमा इजिप्टको टाउको दुखाई बन्न सक्छन् ।
समूह चरण र अन्तिम १६ का खेल अपराजित रहेको मोरोक्को सामना गर्दै गरेको इजिप्टले भने समूह चरणमा नाइजेरियासँग १–० को पराजय भोगेको थियो ।
सेनेगलको परीक्षण हुँदै
गत संस्करणको एफकन च्याम्पियन एल्जेरियालाई १–० गोलान्तरले हराएर प्रतियोगितामा सनसनी मच्चाएको इक्वेटोरियल गिनीको सामना स्टार खेलाडीले भरिएको सेनेगलसँग आजको दोस्रो क्वाटरफाइनलमा हुँदैछ ।
लिभरपुलका फरवार्ड साडिओ माने घाइते भएकाले उनको उपस्थिती आजको खेलमा अनिश्चित भएपनि इडवार्ड मेन्डी, बोउना सार, कालिडो कोउलिबाली, अब्दु डियालो र सालियो सिसको डिफेन्स लाइन चिर्न गिनीलाई गाह्रो पर्ने निश्चित छ ।
मानेले आजको खेल गुमाए उनको स्थानमा क्रिस्टल प्यालेसका चेखौ काउयाटेले सेनेगलको आक्रमण सम्हाल्न सक्ननेछन् ।
यता इक्वेटोरियल गिनी भने सेनेगलविरुद्ध पनि एल्जेरियाको जस्तै नतिजा निकालन चाहन्छ । गिनीको पोस्ट जेसस ओवोनोले सम्हाल्दा अग्रपंक्तिमा भने केही परिवर्तन हुन सक्नेछ ।
जोसेटे मिरान्डा दोहोरो पहेँलो कार्डका कारण आजको खेलमा निलम्बित भएसँगै उनको स्थानमा जेनिक बुइललो मैदानमा सुरुवात गर्न सक्नेछन् ।
सेनेगल र इक्वेटोरियल गिनीबीचको खेल अहमदौ अहिजो रङ्गशालामा नेपाली समय अनुसार राती १२ः४५ बजे सुरू हुनेछ ।
हिजो भएका दुई क्वाटरफाइनल खेलमा विजयी हुँदै आयोजक क्यामरुन र बुर्किना फासोले एफकन २०२१ को सेमिफाइनलमा स्थान पक्का गरिसकेका छन् ।
