२०औं संस्करणको आहा रारा गोल्डकपको उपाधि नेपाल एपिएफले जितेको छ ।
पेनाल्टी सुटआउटमा मनाङलाई ५–४ ले पराजित गर्दै एपिएफ पहिलो पटक उपाधि जित्न सफल भएको हो ।
एपिएफलाई जिताउन गोलरक्षक युया नायक बने ।
२०औं संस्करणको आहा रारा गोल्डकपको फाइनलमा आज पोखरा रङ्गशालामा मनाङ र एपिएफ उपाधिका लागि भिडेका थिए ।
निर्धारित ९० मिनेटमा दुवै टोलीले रोमाञ्चक २–२ गोलको बराबरी खेलेपछि खेल अतिरिक्त समय हुँदै सुटआउटतर्फ धकेलिएको थियो ।
निर्धारित समयमा एपिएफका युवराज खड्का र रवि थिङ गोल गर्न सफल हुँदा मनाङका दयानन्द सिंह र फ्रयाङ्कलिन कियेटे टल्ला गोल गर्न सफल भए ।
मनाङ र एपिएफले सुरुवाती मिनेटबाटै नै एकअर्काको पोस्टमा धावना बोल्न सुरू गरेका थिए ।
खेलको पाँचौँ एपिएफले फ्रिकिको मौका पाएको थियो । एपिएफका विकी तामाङलाई मनाङका शिव तामाङले फाउन गरेपछि एपिएफले फ्रिकिक पाएको थियो ।
एपिएफका कप्तान नविन लामाले गरेको क्रसमा अर्मान्ड विडोम कनेक्ट हुन सफल भएपनि उनी गोल गर्न असमर्थ रहे ।
नवौं मिनेटमा मनाङले गोलको प्रयास गरेको थियो । आडेलाजा सोमिडेका लागि ओलावालेले थ्रु बल निकालिदिए पनि सोमिडे गोल गर्न असफल रहे ।
एपिएफले पहिलो हाफको २०औं मिनेटमा गोल गर्दै सुरुवाती अग्रता लिन सफल भयो । एपिएफका लागि युवराज खड्काले सुन्दर गोल गरे ।
डिफ्लेक्ट हुँदै मैदानको मध्य भागमा आएको बललाई एपिएफका अर्मान्ड विडोमले नियन्त्रणमा लिँदै गोलका लागि मुभ सुरू गरेका थिए ।
विडोमले राइट फ्ल्याङ्कमा निकालिदिएको बलमा खड्काले मनाङका दुई डिफेन्डर र गोलरक्षकलाई बिट गर्दै सुन्दर गोल गर्न सफल भए ।
त्यसपछि मनाङले जवाफी गोल गर्न प्रयास गरे पनि सफल हुन सकेन । ४४औं मिनेटमा मनाङका ओलावलेले प्रयास गरे पनि उनी अफसाइड रहे ।
पहिलो हाफअघि १–० को अग्रता लिएको एपिएफले दोस्रो हाफको सुरुवातबाटै आक्रमण सुरू गरेको थियो ।
तर निकै सन्तुलित खेल प्रस्तुत गरेको मनाङ डिफेन्डिङ र अट्याकिङ दुवैमा सफल रह्यो ।
५२औं मिनेटमा कप्तान लामा गोल गर्नबाट चुक्दा एपिएफ दुई गोलको अग्रता बनाउनबाट चुक्यो ।
मनाङको पेनाल्टी क्षेत्र नजिकै पाएको फ्रिकिकलाई लामाले बललाई पोस्टको दिशा दिए पनि सफल हुन सकेनन् ।
५८औं मिनेटमा रुपेश केसीको प्रहारलाई एपिएफका गोलरक्षक कुरियामा युयाले उत्कृष्ट सेभ गरिदिएपछि खेलमा मनाङ बराबरी गोल गर्न असफल रह्यो ।
दयानन्द सिंहले खेलको ६७औं मिनेटमा जवाफी गोल फर्काउँदै मनाङलाई खेलमा फर्काए ।
कप्तान विमल रानाको पासमा उनले गोल गरेका थिए । राइट फ्ल्याङ्कबाट रानाले निकालिदिएको बलमा सिंह सुन्दर हेड गर्दै बराबरी गोल गर्न सफल भएका थिए ।
७२औं मिनेटमा अर्मान्ड विडोम गोल गर्न असफल बन्दा एपिएफ खेलमा दोस्रो अग्रता लिनबाट वञ्चित बन्यो ।
राइट फ्ल्याङ्कबाट कप्तान नविन लामाले निकालिदिएको क्रसलाई विडोमले मनाङको फाइनल थर्डभित्र नियन्त्रण लिँदै गोलका लागि प्रयास गरे पनि असफल भए ।
जवाफी गोल गरेपछि अट्याकिङ मुडमा देखिएको मनाङ खेलको ८४औं मिनेटमा दोस्रो गोल गर्दै खेलमा अग्रता लिन सफल बन्यो ।
फ्रयाङ्कलिन कियेटे टल्लाले गोल गर्दै मनाङलाई अग्रता दिलाए ।
दयानन्द सिंहलाई एपिएफका राजन गुरुङले तानेर लडाएपछि मनाङले फ्रिकिक पाएको थियो । सोही फ्रिकिकमा मनाङका टल्ला हेडमार्फत गोल गर्न सफल भए ।
एक गोलले पछि परेपछि अत्तालिएको एपिएफ ८७औं मिनेटमा खेल बराबरी गर्नबाट चुकेको थियो ।
एपिएफका मणि लामाले ८७औं मिनेटमा पोस्टमा सुन्दर प्रहार गरेपनि मनाङका गोलरक्षक अशोक बराल गोलका लागि बाधक बने ।
दोस्रो हाफको अन्त्यसम्ममा २–१ ले पछि परेको स्थिती उल्टाउँदै एपिएफ थपिएको पाँच मिनेटको पहिलो मिनेटमा नै गोल गर्न सफल भयो ।
एपिएफका लागि रवि थिङ जवाफी गोल फर्काउन सफल भएपछि फाइनल रोमाञ्चक बन्यो ।
आफ्नो डिफेन्डरबाट आएको लामो क्रसलाई थिङ गोलमा परिणत गर्न सफल भएका थिए ।
मनाङको पेनाल्टी क्षेत्रभित्र आएको बललाई एफिएफका सविन गुरुङले फस्ट टच गर्दै नियन्त्रणमा लिन असफल भएपनि उचाइँ लिएको बलमा थिङ हेड गर्दै जवाफी गोल गर्न सफल भए ।
निर्धारित समयपछि खेलमा थपिएको ३० मिनेटको पहिलो हाफमा दुवै टोली गोल गर्न असफल रहे ।
पहिलो हाफको अन्त्यतिर एपिएफले अवसर सिर्जना गरे त्यसलाई गोलमा परिणत गर्न असफल रह्यो ।
अतिरिक्त समयको दोस्रो हाफको सुरुवातबाट नै दुवै टोली आक्रमक रुपमा प्रस्तुत भएका थिए ।
मनाङको तुलनामा एपिएफले धेरै प्रयास गरे पनि सफल भने हुन सकेन ।
खेलको ११९औं मिनेटमा एपिएफका विडोम गोल गर्नबाट चुकेपछि एपिएफले पेनाल्टी सुटआउटमा नपुगी उपधि जित्ने अवसर गुमाएको थियो ।
पेनाल्टीमा एपिएफका नविन लामा, सनिस श्रेष्ठ, रवि थिङ, मणि लामा र विडोमले गोल गर्दा मनाङका चार खेलाडी मात्र गोल गर्न सफल भए ।
मनाङका ओलावालेको प्रहार एपिएफका गोलरक्षक युया कुरियामाले रोकका थिए ।
आजको खेलमा विजयी भएसँगै एपिएफले ट्रफीसहित नगद दश लाख एक हजार जितेको छ ।
यता उपविजेता बनेको मनाङले भने पाँच लाख एक हजार नगद पुरस्कार प्राप्त गरेको छ ।
