विष्णु गुरुङले नेपाली राष्ट्रिय फुटबल टिम सहायक प्रशिक्षकको रूपमा आज डेब्यु गर्दै छन् ।
अफ्रिकी मुलुक मोरिससविरुद्धको मैत्रीपूर्ण खेलका क्रममा विष्णुले असिस्टेन्ट कोचको रूपमा डेब्यु गर्न लागेका हुन् ।
नेपाली राष्ट्रिय पुरुष फुटबल टोलीले आज अपराह्न मोरिससविरुद्ध पहिलो मैत्रीपूर्ण खेल खेल्दै छ ।
त्रिपुरेश्वरस्थित दशरथ रङ्गशालामा हुने सो खेल अपराह्न ४ः४५ बजेबाट सुरु हुनेछ ।
यो खेल सहायक प्रशिक्षकको रूपमा विष्णुका लागि पहिलो हुने छ ।
ए डिभिजन क्लब सङ्कटाका मुख्य प्रशिक्षक गुरुङ केही समयअघि मात्र सहायक प्रशिक्षकको रूपमा टिममा जोडिएका हुन् ।
मुख्य प्रशिक्षक अब्दुलाह अलमुताइरीको आग्रहमा प्रशिक्षक गुरुङलाई टोलीमा आबद्द गरिएको हो ।
राष्ट्रिय टिमको सहायक प्रशिक्षकमा भने किरण श्रेष्ठ र गोलकिपर प्रशिक्षकमा विकास मल्ल रहेका छन् ।
गुरुङको नेतृत्वमा संकटाले जारी लिगमा उत्कृष्ट खेलिरहेको छ ।
गुरुङ राष्ट्रिय फुटसल टिमको मुख्य प्रशिक्षक भएर काम गरिसकेका छन् ।
को हुन् विष्णु ?
खेलाडीको रूपमा राष्ट्रिय फुटबल टोलीको जर्सी लगाउने सपना पूरा नभएपनि उनको परिचय फुटबलले नै बनेको हो ।
सहारा एकेडेमीको पहिलो ब्याचका रूपमा फुटबलको गुण सिकेका विष्णु अहिले विस्तारै फुटबल प्रशिक्षकका रुपमा स्थापित हुने क्रममा छन् ।
३६ वर्षीय विष्णुले प्रशिक्षककै रूपमा पहिलो औपचारिक नियुक्ति भने सहारा एकेडेमीको प्रशिक्षकका रूपमा लिए ।
थ्री स्टार क्लबमा लामो समय आबद्ध रहेका विष्णुको पछिल्लो नाता भने सङ्कटाका रुपमा जोडिएको थियो ।
सी लाइसेन्स लिइसकेपछि बनेपा ब्वाइज क्लब (बिबिसी) को सी डिभिजन छनोट, आइडिएल कपमा कलेज टोली हुँदै ललित स्मृतिमा थ्री स्टारको युवा टोलीलाई प्रशिक्षण दिएका थिए ।
सी लिएको केहि समयमै एसियाली फुटबल महासंघ (एएफसी) ले उनलाई बी लाइसेन्स कोर्षका लागि छनोट गर्यो ।
उनले राष्ट्रिय फुटसल टोलीको मुख्य प्रशिक्षकको जिम्मेवारी पनि निर्वाह गरे । छोटो अवधिमै उनले राष्ट्रिय टोली तयार पारेर एसियन कप छनोटमा टोलीको प्रशिक्षण सम्हाले ।
