नेपालका पाँच युवाले सर्वाधिक उचाइमा गीत रेकर्ड तथा भिडियो छायाङ्कन गरेर विश्व कीर्तिमान बनाएका छन् ।
पाँच हजार मिटरभन्दा बढीको उचाइमा गीत रेकर्ड तथा भिडियो छायाँकन गरेर पाँच नेपाली युवाले विश्व रेकर्ड कायम गरेका हुन् ।
पत्रकारिता र कलाकारितामा रहेका युवाहरूले गरेको दाबीलाई गिनिज बुक अफ वर्ल्डले स्वीकृत गरेर गिनिज बुकमा रेकर्ड दर्ता गराएको छ ।
सोलुखुम्बुको खारे (मेरा पिकजाने बाटो) मा पुगेर छायाङ्कन गरेर गरिएको रेकर्ड दाबीलाई गिनिज बुकले मान्यता दिएको हो ।
‘सुन्दर हिमाल’ बोलको गीत बुद्धिराज राई (दुर्लभ जन्तरे) ले लेखेका हुन् ।
गीतमा डिआर अटुको सङ्गीत र टेक नाछिरिङको स्वर छ ।
कोरस गायनमा माया गुरुङ र शिखरजङ्ग श्रेष्ठ (गजरकोटे) ले साथ दिएका छन् ।
स्थलगत रेकर्डिङ गरिएको गीतमा शिवराज जोशीको मादल, बाँसुरी डम्बर सिंह राई र किबोर्ड टेक नाछिरिङले बजाएका छन् ।
रेकडिस्टकाे भूमिका शिखरजङ्ग श्रेष्ठ (गजरकोटे) ले निर्वाह गरेका छन् ।
खारेमै छायाङ्कन गरिएको म्युजिक भिडियोको निर्देशन बुद्धिराज राई (दुर्लभ जन्तरे) ले गरेका छन् ।
गीत रेकर्डिङ र भिडियो छायाङ्कनको काम १ सेप्टेम्बर सन् २०२१ मा सम्पन्न गरिएको थियो ।
