नेपाल सुपर लिग (एनएसएल) फुटबलको दोस्रो संस्करण आगामी चैत २६ गतेबाट सुरु हुने भएको छ ।
आयोजक नेपाल स्पोर्ट्स एन्ड इभेन्ट्स म्यानेजमेन्ट (एनएसइएम) ले बुधबार विज्ञप्ति जारी गर्दै दोस्रो संस्करणकाे एनएसएल चैत २६ देखि २०७९ जेठ ७ गतेसम्म हुने जनाएको हो ।
आयोजकका अनुसार दोस्रो संस्करणमा तीन टोली थपिएका छन् ।
अघिल्लो संस्करणमा सात टिम सहभागी भएको अब १० टोलीको सहभागिता रहने आयोजकले जनाएको छ । तथापि, क्लबको नाम भने हालसम्म खुलाइएको छैन ।
पहिलाे संस्करण काठमाडाैँस्थित दशरथ रङ्गशालामा भएकाे थियाे । तर यस संस्करणकाे एनएसएल भने दुई स्थानमा गरिने भएकाे छ । आयोजकका अनुसार यसपटक पहिलो चरणको खेल पोखरा र दोस्रो चरणका खेलहरू काठमाडौँमा सञ्चालन गरिने भएकाे छ ।
पहिलो संस्करणमा काठमाडौँ रेजर्सले फाइनलमा धनगढी एफसीलाई पराजित गर्दै उपाधि जितेको थियो ।
