अफ्रिकी टोली मोरिसससँगको दुई मैत्रीपूर्ण फुटबल खेल्नका लागि राष्ट्रिय टोलीका कप्तान किरण चेमजोङ नेपाल फर्किएका छन् ।
मङ्गलबार साँझ उनी माल्दिभ्सबाट नेपाल फर्किएका हुन् ।
माल्दिभ्सको प्रेसिडेन्ट कप २०२१/२२ को फाइनल खेलेर किरण नेपाल फर्किएका हुन् ।
उनी सम्मेलित माजिया स्पोर्ट्स एन्ड रिक्रिएसन फाइनलमा पराजित भएको थियो ।
अब, किरणले पिसिआर परीक्षण गरेर राष्ट्रिय टिमको प्रशिक्षणमा सहभागिता जनाउने छन् ।
नेपालले दशरथ रङ्गशालामा माघ १५ र १८ गते अफ्रिकी देश मोरिसस मैत्रीपूर्ण खेल खेल्दै छ ।
दुवै खेल साँझ ४ः४५ बजे हुनेछ । मैत्रीपूर्ण खेलका लागि मरिसस टोली सोमबार काठमाडौँ आइसकेको छ ।
नेपाली टोली पनि अन्तिम तयारीमा छ ।
अफ्रिकी देश मोरिसस फिफा वरीयतामा एक सय ७२औँ स्थानमा छ । नेपाल एक सय ६९औँ स्थानमा छ ।
मोरिसस नेपालका लागि आधिकारिक पहिलो अफ्रिकन प्रतिद्वन्द्वी हो ।
नेपालले आफ्नो फुटबल इतिहासमा पहिलो पटक औपचारिक मान्यताप्राप्त आधिकारिक खेलमा कुनै अफ्रिकी देशको सामना गर्न लागेको हो ।
यसअघि नेपालले अफ्रिकी राष्ट्रसँग फुटबल खेलेको थिएन ।
यसअघि नेपालले दुई पटक अफ्रिदी देशसँग खेलेको भएपनि ती दुवै खेल औपचारिक मान्यताप्राप्त भने थिएनन् ।
सन् १९८३ मा नेपालले मलेसियामा भएको मर्डेका कप खेलेको थियो, जसमा उसले अल्जेरिया ११ सँग खेलेको थियो ।
सो खेलमा नेपाल २–० गोलले पराजित भएको थियो ।
यस्तै, सन् २००८ को मर्डेका कपमै नेपालले सिरालियोन यु–२० सँग खेलेको थियो ।
जसमा नेपाल ३–१ ले पराजित भएको थियो ।
मोरिससले एक पटक अफ्रिका कप अफ नेसन्समा सहभागिता जनाइसकेको छ ।
सन् १९७४ मा उक्त प्रतियोगिता खेलेको माेरिससका लागि यो नै ठुलो उपलब्धि हो ।
यता, मोरिससको भने यो दोस्रो दक्षिण एसियाको भ्रमण हो ।
यसअघि उसले सन् २०१७ मा भारतको भ्रमण गरेको थियो, जसमा मोरिसस २-१ गोलले पराजित भएको थियो ।
अब, उसले नेपालविरुद्ध कस्तो प्रदर्शन गर्ला ? यो भने प्रतिक्षित विषय बनेको छ ।
