नेपाल र अफ्रिकी टोली मोरिससबीच दुईवटै मैत्रीपूर्ण फुटबल खेलमा दर्शकले मैदान प्रवेशमा पाउने भएका छन् ।
दशरथ रङ्गशालामा माघ १५ र १८ गते हुने नेपाल र अफ्रिकी देश मोरिससबीचको खेल दर्शकसहितको हुने भएको हो ।
मङ्गलबार अखिल नेपाल फुटबल सङ्घ (एन्फा) मोरिसससँगको दुवै खेल दर्शकसहितको रङ्गशालामा हुने जानकारी दिएको छ ।
सरकारले निर्धारण गरेको स्वास्थ्य मापदण्ड अपनाएर रङ्गशालालामा कुल दर्शक क्षमताको एक तिहाईलाई मात्र प्रवेश दिइने एन्फाले जानकारी दिएको छ ।
एन्फाका अनुसार मैत्रीपूर्ण खेलका लागि दर्शकलाई साधारण प्यारापिटको पाँच सय र भिआइपी प्यारापिटको एक हजार रुपैयाँ शुल्क तय गरिएको छ ।
दशरथ रङ्गशालाको कूल दर्शक क्षमता १५ हजार रहेको छ । फुटबल हेर्न टिकट काट्ने दर्शकले कोरोना खोप लगाएको कार्ड अनिवार्य देखाउनुपर्ने छ ।
दुवै खेल साँझ ४ः४५ बजे हुनेछ । मैत्रीपूर्ण खेलका लागि मरिसस टोली सोमबार काठमाडौँ आइसकेको छ ।
नेपाली टोली पनि अन्तिम तयारीमा छ ।
अफ्रिकी देश मोरिसस फिफा वरीयतामा एक सय ७२औँ स्थानमा छ । नेपाल एक सय ६९औँ स्थानमा छ ।
मोरिसस नेपालका लागि आधिकारिक पहिलो अफ्रिकन प्रतिद्वन्द्वी हो ।
नेपालले आफ्नो फुटबल इतिहासमा पहिलो पटक औपचारिक मान्यताप्राप्त आधिकारिक खेलमा कुनै अफ्रिकी देशको सामना गर्न लागेको हो ।
यसअघि नेपालले अफ्रिकी राष्ट्रसँग फुटबल खेलेको थिएन ।
यसअघि नेपालले दुई पटक अफ्रिदी देशसँग खेलेको भएपनि ती दुवै खेल औपचारिक मान्यताप्राप्त भने थिएनन् ।
सन् १९८३ मा नेपालले मलेसियामा भएको मर्डेका कप खेलेको थियो, जसमा उसले अल्जेरिया ११ सँग खेलेको थियो ।
सो खेलमा नेपाल २–० गोलले पराजित भएको थियो ।
यस्तै, सन् २००८ को मर्डेका कपमै नेपालले सिरालियोन यु–२० सँग खेलेको थियो ।
जसमा नेपाल ३–१ ले पराजित भएको थियो ।
मोरिससले एक पटक अफ्रिका कप अफ नेसन्समा सहभागिता जनाइसकेको छ ।
सन् १९७४ मा उक्त प्रतियोगिता खेलेको माेरिससका लागि यो नै ठुलो उपलब्धि हो ।
यता, मोरिससको भने यो दोस्रो दक्षिण एसियाको भ्रमण हो ।
यसअघि उसले सन् २०१७ मा भारतको भ्रमण गरेको थियो, जसमा मोरिसस २-१ गोलले पराजित भएको थियो ।
अब, उसले नेपालविरुद्ध कस्तो प्रदर्शन गर्ला ? यो भने प्रतिक्षित विषय बनेको छ ।
