२०औं संस्करणको आहा रारा गोल्डकपको चौथो क्वाटरफाइनलमा आज विभागीय टोली त्रिभुवन आर्मी फुटबल क्लब र थ्रीस्टार क्लब भिड्ने भएका छन् ।
पोखरा रङ्गशालामा हुने अन्तिम क्वाटरफाइनल खेल दिउँसो २ः३० बजे सुरु हुँदैछ ।
प्रतियोगिताको आ–आफ्नो पहिलो खेल खेल्न लागेका दुवै टोली जित निकाल्दै सेमिफाइनलमा पुग्न चाहन्छ । दुवै टोली गोल्डकपमा अनुभवी टोली हुन् ।
चार पटक उपविजेता बनेको आर्मीले आज पाँच पटक आहा रारा गोल्डकपको उपाधि जिति सकेको थ्रीस्टारलाई सामना गर्दैछ ।
आजको खेलमा थ्रीस्टारलाई पाखा लगाउन सके आर्माीले २०७५ को फाइनलमा भोगेको हारको बदला लिनेछ । निर्धारित समयमा बराबरी भएपछि उपाधि छिनोफानोका लागि भएको टाइब्रेकरमा थ्रीस्टारले बाजी मार्दा आर्मी खाली हात फर्किएको थियो ।
आजको अन्तिम क्वाटरफाइनल जित्ने टोलीले फाइनल प्रवेशका लागि मनाङ मस्र्याङ्दीसँग माघ १३ गते प्रतिस्पर्धा गर्नेछ । नेपाल पुलिस क्लबलाई २–० ले स्तब्ध बनाउँदै मनाङले सेमिफाइनलमा स्थान बनाइसेको छ ।
सहारा क्लब पोखराको आयोजनामा भइरहेको प्रतियोगिताका अन्य दुई सेमिफाइनलिस्ट टोलीका रुपमा नेपाल एपिएफ क्लब र मछिन्द्र क्लब रहेका छन् ।
प्रतियोगिताको विजेताले १० लाख १ हजार र उपविजेता टिमले ५ लाख १ हजार प्राप्त गर्नेछन् ।
