मोरङको लेटाङ नगरपालिकाबाट हत्या गरेको आरोपमा एक वृद्ध पक्राउ परेका छन् ।
पक्राउ पर्नेमा लेटाङ–२ फँडानीका ८० वर्षीय डम्बरबहादुर भुजेल रहेको जिल्ला प्रहरी कार्यालय मोरङले जनाएको छ ।
मोरङ प्रहरी प्रवक्ता डिएसपी दीपक श्रेष्ठका अनुसार सुन्दरहरैँचा नगरपालिका–२ का ६३ वर्षीय प्रेमबहादुर बुढाथोकीको हत्या आरोपमा उनलाई पक्राउ गरिएको हो ।
मृतक र अभियुक्त साथी–साथी रहेको प्रहरीले जनाएको छ । मृतक बुढाथोकी केही दिनयता हत्या आरोपी भुजेलको घरमा बसेका थिए ।
सोमबार बेलुका उनीहरूले सँगै मदिरा सेवन गरेका थिए । मदिरा सेवनपछि उनीहरूबीच विवाद भएको र विवादपछि बन्चरोले अनुहार तथा टाउकोमा प्रहार गरी हत्या गरेको डिएसपी श्रेष्ठको भनाइ छ ।
सोमबार राति बुढाथोकीको शव भुजेलको आँगननजिकै भेटिएको थियो । बेलुका घरबाट शव घिसारेर बाँसघारीसम्म लैजाँदै गर्दा स्थानीयले देखेपछि प्रहरीलाई खबर गरेका थिए । स्थानीयको खबरलगत्तै पुगेको इलाका प्रहरी कार्यालय लेटाङबाट खटिएको प्रहरी टोलीले उनलाई पक्राउ गरेको थियो ।
प्रहरीले मृतकको शव पोस्टमार्टमका लागि बिपी कोइराला स्वास्थ्य विज्ञान प्रतिष्ठान धरान पठाएको छ । पक्राउ परेका उनीमाथि कर्तब्य ज्यान कसुरमा मोरङ जिल्ला अदालतबाट पाँच दिनको म्याद थप गरी अनुसन्धान कार्य भइरहेको श्रेष्ठले जानकारी दिए ।
