गर्भवती महिलाहरूलाई कोरोना भाइरसविरुद्धको खोप लिनका लागि ढिलाइ नगर्न आग्रह गरिएको छ ।
गर्भवती महिलाहरू कोरोना भाइरसको सङ्क्रमणको जोखिममा रहेको हुनाले उनिहरूलाई खोप लिन ढिला नगर्न आग्रह गरिएको हो । बेलायतको प्रसूति निगरानी प्रणालीका अनुसार गत वर्ष मे र अक्टोबरको बीचमा कोभिडका लक्षण सहित अस्पतालमा भर्ना भएका ९६ प्रतिशत भन्दा बढी गर्भवती महिलाहरूले खोप लगाएका थिएनन् ।
भाइरसविरुद्धको खोप सुरक्षित रहेको र यसले प्रजनन क्षमतामा कुनै असर नगर्ने जनाइएको छ । सङ्क्रमणपछि अस्पतालमा भर्ना भएका पाँच मध्ये एक गर्भवती महिलालाई निको हुनका लागि समयभन्दा अगावै डेलिभर गर्न आवश्यक हुन्छ ।
सङ्क्रमित महिलाबाट जन्मेका पाँच मध्ये एक शिशुलाई निओनेटल केयर चाहिने स्वास्थ्य र सामाजिक हेरचाह विभागले जनाएको छ ।
सङ्क्रमणको पछिल्लो लहरमा मृत शिशुको जन्म, वा नवजात शिशुको मृत्यु भएको देखेका छौ, प्रमुख वैज्ञानिक सल्लाहकार प्रोफेसर लुसी चैपलले भनिन् । खोपले गर्भवती महिलामा भाइरसकोविरुद्ध एन्टिबडी उत्पादन गर्छ, जुन उनिहरूको बच्चाहरूमा पुगेर बच्चालाई पनि सुरक्षा प्रदान गर्ने उनको भनाइ छ ।
