सहिद स्मारक ‘ए’ डिभिजन लिगको आधा सिजन सकिएको छ ।
सोमबार दिउँसो सातौँ चरण सकिँदा लिगको आधाभन्दा धेरै खेल सकिएका हुन् ।
९१ खेलको लिगमा अलिहे ४९ खेल सकिएका छन् भने अब ६ चरणका ४२ खेल बाँकी छन् ।
यस्तोमा अहिले लिगले आधा सिजनको विजेता भने पाइसकेको छ ।
साविक विजेता क्लब मच्छिन्द्र आधा सिजनको विजेता बनेर एएफसी कपको लागि छनोट भएको छ ।
एसियाली फुटबल महासङ्घ (एएफसी) को आयोजनामा हुने महाद्वीप स्तरीय प्रतियोगितामा लिग च्याम्पियन छनोट हुने प्रावधान छ ।
तर अखिल नेपाल फुटबल सङ्घ (एन्फा) ले लिगको तालिका सार्वजनिक गर्दा एएफसी क्लब लाइसन्स प्राप्त क्लबमध्ये सातौँ राउन्डसम्म शीर्षस्थानमा रहने टोलीलाई एएफसी कपमा सहभागी गराउने निर्णय गरेको थियो ।
सोही निर्णयअनुसार मच्छिन्द्रले पहिलो पटक एएफसी कपमा नेपालको प्रतिनिधित्व गर्ने भएको हो ।
मच्छिन्द्रका प्रशिक्षक प्रवेश कटुवालले सातौँ राउन्डसम्मको प्रदर्शन उत्साहपूर्ण भएको बताउँदै एएफसीमा छनोट हुँदा खुसी लागेको सुनाए ।
उनले भने, ‘अघिल्लो वर्ष लिग च्याम्पियन बनेरपनि एएफसी क्लब लाइसन्सका कारण खेल्न पाइएन । यसपटक खेल्न पाउँदा खुसी छौँ । टोलीमा राम्रा विदेशी खेलाडी समावेश गरेर बलियो चुनौती दिनेछौँ । त्योसँगै मच्छिन्द्रको लक्ष्य लिग च्याम्पियन बन्नु हो ।’
सातौँ राउन्डसम्म अगाडि देखिए पनि मच्छिन्द्रलाई लिगको उपाधि चुम्न अझै ६ खेलमा राम्रो प्रदर्शन गर्नुपर्ने हुन्छ ।
यद्यपि, मच्छिन्द्रले अहिले लिग तालिकाको शीर्ष पाँचमा रहेका बलिया टोलीको सामना गरिसकेको भएका कारण पनि आगामी खेल सहज हुने अपेक्षा गरेको छ ।
मच्छिन्द्रले मनाङ मर्स्याङ्दी क्लब, सङ्कटा क्लब, त्रिभुवन आर्मी क्लब र हिमालयन शेर्पाविरुद्ध खेलिसकेको छ ।
तुलनात्मक हिसाबले मच्छिन्द्रका लागि अबका प्रतिद्वन्द्वी केही सजिलो हुने देखिएको छ । लिगमा मच्छिन्द्रसँगै सङ्कटा र साविक उपविजेता आर्मीले अपराजित यात्रा कायम राखेका छन् ।
अहिले तालिकाको शीर्षस्थानमा हरेको मच्छिन्द्रको १७ अङ्क छ ।
मच्छिन्द्रलाई पछ्याएको मनाङ १६ अङ्कसहित दोस्रो स्थानमा छ भने तेस्रो स्थानमा रहेको सङ्कटासँग १३, चौथो स्थानमा रहेको आर्मीसँग ११, पाँचौँ स्थानमा रहेको थ्रीस्टार र छैटौँ स्थानमा रहेको न्युरोड टिम (एनआरटी) सँग १०-१० अङ्क छ ।
सातौँ र आठौँ स्थानमा रहेको सातदोबाटो र हिमालयन शेर्पाको समान आठ अङ्क छ । सात अङ्क बनाएको जावलाखेल नवौँ स्थानमा छ ।
लिगको उपाधि होडसँगै रेलिगेसन (‘बी’ डिभिजनमा घटुवा) को दबाबले पनि क्लबलाई चिन्ता थपेको छ ।
अहिले फ्रेन्ड्स र च्यासल रेलिगेसनको रेखामा छन् । फ्रेन्ड्स सातौँ राउन्डसम्म एउटै खेल नजित्ने एक्लो टोली हो ।
अन्तिममा रहेको फ्रेन्ड्सको तीन अङ्क छ । १२औँ स्थानमा हरेको ब्रिगेड ब्वाइज र १३औँ स्थानमा रहेको च्यासलको समान पाँच अङ्क छ ।
समान ६ अङ्क सहित १०औँ र ११औँ स्थानमा रहेका एपिएफ र नेपाल पुलिस क्लब पनि रेलिगेसनको दबाबमा छन् । लिगको अन्तिमा रहने दुई टोली रेलिगेसन हुनेछन् ।
आधा सिजनको खेल सकिँदा पनि लिगमा सय गोल पुग्न सकेको छैन । त्यसैले यो सिजन सकिँदा जति कुरा भयो त्यो समग्र लिगको आधा सिजन सकिँदाको कुरा हुन् ।
यसले विजेता र उपविजेताको छनक त दिन्छ नै रेलिगेसनका सम्भावित टिमहरुको पनि जानकारी दिन्छ । लिगको सातौँ चरणका सात खेलमा १३ गोल भएपछि अहिले लिगमा ९४ गोल भएका छन् ।
यसमा, सर्वाधिक गोल गर्ने खेलाडीको शीर्ष सूचीमा मच्छिन्द्रका सुनिल बल छन् । बलपछि सातदोबाटोमा अजयी मार्टिन्स र एपिएफका आशिष लामा छन् । उनीहरूले चार-चार गोल गरेका छन् ।
तीन गोल गर्नेमा पुलिसका सुमन लामा, च्यासलका रुमेश बर्तौला, हिमालयन शेर्पाका मुताम्बा पिस्टोन, मनाङका अन्जन विष्ट तथा सङ्कटाका निरज बस्नेत र उक्तम राई छन् ।
यो पनि :
