अस्ट्रियामा अरूको सहयोग लिएर इच्छा मृत्यु रोज्न पाइने कानुन कार्यान्वयनमा आएको छ । यो सातादेखि अस्ट्रियामा गम्भीर रोग लागेका वा कमजोर शारीरिक अवस्थामा पुगेका वयस्कहरूले अरूको सहयोग लिएर इच्छा मृत्यु रोज्न पाउने प्रावधान ल्याइएको हो ।
तर आत्महत्या रोज्ने प्रत्येक निर्णयलाई दुई चिकित्सकले मूल्याङ्कन गरेपछि मात्रै स्वीकृति दिइने छ । जसमध्ये एकजना गम्भीर रोग हुँदा उपलब्ध गराइने विशेषज्ञ (प्यालीअटिभ केयर) हुनुपर्ने जनाइएको छ ।
चिकित्सकबाट अनुमति पाएपछि पनि आफ्नो निर्णयबारे पुनर्विचार गर्न १२ हप्तासम्म र निको भएका बिरामीले पनि दुई हप्तासम्म आफ्नो निर्णय पुनर्विचारका लागि पर्खिनुपर्ने हुन्छ । त्यसपछि पनि मृत्यु रोजेकाहरूले वकिल वा नोटरीलाई जानकारी गराएर औषधि पसलबाट प्राणघातक औषधि किनेर सेवन गर्न पाउने छन् ।
प्राणघातक औषधिको दुरुपयोग रोक्नका लागि मानिसहरूले इच्छा मृत्युको निर्णयबारे जानकारी गराएका वकिल वा नोटरीलाई मात्रै औषधि पसलबारे जानकारी हुनेछ । संवैधानिक अदालतको निर्देशनपछि गत महिना अस्ट्रियाको संसद्ले यससम्बन्धी कानुन बनाएको थियो । अस्ट्रियामा चिकित्सकको अनुमतिबिना अरूको सहयोग लिएर गरिने इच्छा मृत्यु अझै पनि गैरकानुनी छ र इच्छा मृत्युमा सहयोग गर्नेलाई पाँच वर्षसम्म सजाय हुने कानुनी व्यवस्था छ ।
नयाँ कानुनले बालबालिका र मानसिक समस्या भएका व्यक्तिहरूलाई इच्छा मृत्यु रोज्न रोक लगाएको छ । अस्ट्रियाबाहेक स्विट्जरल्यान्ड, स्पेन, बेल्जियम र नेदरल्यान्डसहित धेरै युरोपेली मुलुकमा इच्छा मृत्युको यो तरिकालाई अपराध मानिँदैन ।
