नयाँ व्यवसाय सुरू गरेका उद्यमी र व्यवसायी लक्षित ‘प्रोजेक्ट फिनिक्स’ प्रदेश १ राजधानी विराटनगरमा हुने भएको छ ।
नयाँ उद्यमीले उत्पादन गरेका वस्तुको प्रदर्शनी, प्रचार, बिक्री र अनुभव आदनप्रदान गर्ने उद्देश्यका साथ उक्त कार्यक्रम आयोजना हुन लागेको हो ।
अङ्ग्रेजी नयाँ वर्ष २०२२ को अवसरमा विराटनगरस्थित नमस्कार होटल म्यानेजमेन्ट स्कूलमा आयोजना हुने ‘प्रोजेक्ट फिनिक्स’ लाई केएल भिज्यूल आर्टस्, बारी, विकल्प एन्ड अल्टरनेटिभ, स्टुडेन्ट फर लिभर्टी (एसएफएल) र विराटनगरका युवाहरूले संयुक्त आयोजना गर्न लागेका हुन् ।
नयाँ उद्यमी र उद्यमबाहेक केही स्थापित भइसकेका व्यवसाय र ब्रान्ड पनि प्रदर्शनीमा सहयोगी संस्थाका रुपमा उपस्थित हुने कार्यक्रमका संयोजक रत्न ज्योती शाक्यले बताए ।
‘विशेषगरी नयाँ उद्यमीलाई एक्सपोजर मिलोस् भन्ने उद्देश्यले प्रदर्शनी राखिएको हो’ संयोजक शाक्यले भने, ‘केही स्थापित उद्यम पनि सहयोगी–सहभागीका रुपमा हुनुहुन्छ । नयाँ उद्यमीले वहाँहरुबाट केही सिक्नुहुनेछ र व्यवसायीक सम्बन्ध विस्तार हुन्छ भन्ने हाम्रो मुख्य उद्देश्य हो ।’
प्रदर्शनीमा विराटनगर र आसपासका दश भन्दा धेरै नयाँ उद्यमी–व्यवसायी आ–आफ्नो उत्पादनसहित सहभागी हुँदैछन् ।
सहभागी हुने उद्यमीलाई निःशुल्क स्टल उपलब्ध गराइएको छ भने अवलोकनकर्तालाई समेत प्रवेश निःशुल्क राखिएको आयोजकले बताएको छ ।
दुई सत्रमा राखिएको कार्यक्रमको पहिलो सत्रमा परिचयात्मक कार्यक्रम र दोस्रो सत्रमा प्रदर्शनी राखिएको छ ।
