बालबालिकालाई फाइजर खोप लगाउन आवश्यक पर्ने सिरिन्ज मङ्गलबारसम्ममा नेपाल आइपुग्ने भएको छ।
स्वास्थ्य सेवा विभाग अन्तर्गतको व्यवस्थापन महाशाखाका निर्देशक डा. रुद्र मरासिनीले कोभ्याक्स मार्फत ६ लाख ६४ हजार पाँच ६० सिरिन्ज आगामी मङ्गलबारसम्ममा आउन लागेको जानकारी दिएका हुन् ।
उनका अनुसार १२ देखि १७ वर्ष उमेर समूहका बालबालिकाका लागि फाइजर खोप लगाउन आवश्यक पर्ने शून्य दशमलव तीन एमएलका सिरिन्ज आउन लागेका हो ।
कोभ्याक्स मार्फत नेपालमा ६ लाख ६४ हजार पाँच सय ६० डोज फाइजर खोप आइपुगेपनि खोपलाई पातलो बनाउने सोडियम क्लोराइड मिश्रित तरल पदार्थ घोलक र सिरिन्ज अभाव भएपछि खोप अभियान स्थगित भएको थियो । घोलक आइपुगिसकेको र अबको एकसातामा सिरिन्ज आएपछि बालबालिकाका लागि खोप अभियान पुन: सुरु हुने डा. मरासिनीको भनाइ छ।
बालबालिकाका लागि थप खोप तथा सिरिन्ज आयत गर्ने प्रक्रिया पनि अगाडि बढाइएको छ ।
