सरकारले प्रधानमन्त्री बालेन्द्र शाहको भारत भ्रमण स्वीकृत गर्नेदेखि देशभरका सरकारी तथा सार्वजनिक जग्गाको नापजाँच गर्ने निर्णयसम्मका सात महत्त्वपूर्ण निर्णय सार्वजनिक गरेको छ।
शुक्रबार बसेको मन्त्रिपरिषद् बैठकका निर्णय सञ्चारमन्त्री विक्रम तिमिल्सिनाले सार्वजनिक गरेका हुन्। बैठकले आगामी मंसिर ६ र ७ गते प्रधानमन्त्री शाहको नेतृत्वमा हुने भारतको राजकीय भ्रमण स्वीकृत गर्नुका साथै भ्रमणमा सहभागी हुने नेपाली प्रतिनिधिमण्डल गठन गर्ने निर्णय गरेको छ।
त्यस्तै, चीन सरकारबाट भोटेकोशी नदीमा आएको आकस्मिक बाढीबाट प्रभावित नागरिकको जीवनरक्षा तथा तत्कालीन उद्धार कार्यका लागि प्राप्त हुने २० लाख अमेरिकी डलर नगद अनुदान सहायता स्वीकार गर्ने निर्णय भएको छ।
अन्तर्राष्ट्रिय मुद्रा कोषबाट र्यापिड क्रेडिट फ्यासिलिटीअन्तर्गत प्राप्त हुने करिब १० करोड ७० लाख अमेरिकी डलर बराबरको निर्ब्याजी सहुलियतपूर्ण ऋण स्वीकार गर्ने निर्णय पनि मन्त्रिपरिषद्ले गरेको छ।
यसैगरी, देशभर नापजाँच हुन बाँकी रहेका सरकारी, सार्वजनिक तथा सामुदायिक जग्गाको नापजाँच गरी लगत तयार गर्न आदेश जारी गर्ने निर्णय भएको छ। यसबाट जग्गाको अभिलेख व्यवस्थित गर्ने सरकारको तयारी देखिएको छ।
बैठकले राष्ट्रिय जैविक विविधता रणनीति तथा कार्ययोजना २०२६–२०३० पनि स्वीकृत गरेको छ। साथै ऐतिहासिक, पुरातात्त्विक तथा सांस्कृतिक सम्पदा संरक्षणसम्बन्धी नम्स २०८३ र राष्ट्रिय झोलुङ्गे पुल नीति २०८३ स्वीकृत गर्ने निर्णय गरेको छ।
मन्त्रिपरिषद्का यी निर्णयमध्ये भारत भ्रमण, बाढी प्रभावितका लागि विदेशी सहायता, सहुलियतपूर्ण ऋण तथा सार्वजनिक जग्गाको अभिलेख व्यवस्थापनलाई महत्त्वपूर्ण निर्णयका रूपमा हेरिएको छ।