काठमाडौं । नेपाली कम्युनिस्ट पार्टीका नेता नारायणकाजी श्रेष्ठले पत्रकारमाथि भएको धरपकड र प्रेस स्वतन्त्रतामाथिको हस्तक्षेपलाई लोकतान्त्रिक सरकारबाट थोपरिएको ‘भद्दा निरंकुशता’ को संज्ञा दिएका छन्।
उनले संविधानप्रदत्त मौलिक अधिकार र प्रेस स्वतन्त्रतामाथि सरकारले गरेको पछिल्लो हस्तक्षेपको भर्त्सना गर्दै यस्तो कार्य तत्काल अन्त्य गर्न माग गरेका छन्।
सामाजिक सञ्जालमार्फत आफ्नो धारणा सार्वजनिक गर्दै श्रेष्ठले नेपालले लामो बलिदानीपूर्ण संघर्षबाट निरंकुशतन्त्र परास्त गरी मौलिक विशेषतासहितको लोकतान्त्रिक व्यवस्था स्थापना गरेको स्मरण गराएका छन्। तर अहिले लोकतान्त्रिक प्रणालीअन्तर्गत निर्वाचित सरकारबाटै निरंकुश व्यवहार व्यहोर्नुपरेको उनको भनाइ छ।
पत्रकारलाई गिरफ्तार गर्ने, पक्राउ गर्न पत्रिकाका कार्यालयमा प्रहरी परिचालन गरी घेराबन्दी गर्ने तथा यसमा प्रधानमन्त्रीको सचिवालयको चासो रहेको भन्ने प्रहरीको आधिकारिक जानकारी आउने तर प्रधानमन्त्रीको प्रेस सचिवालयले त्यसबारे कुनै सम्बन्ध र जानकारी नरहेको बताउने घटनाक्रमप्रति उनले आपत्ति जनाएका छन्।
‘यो सरकारले संविधानमाथि गरेको आक्रमण र निरंकुशता मात्र होइन, सरकारको न्यूनतम लोकतान्त्रिक आचरण र कार्यशैलीको घोर उल्लंघन हो,’ श्रेष्ठले लेखेका छन्।
सुशासन, समृद्धि र सामाजिक न्यायको नारा दिएर सत्तामा पुगेको सरकारले यस्तो कार्य गर्नु जनताको भावना र लोकतन्त्रमाथिको गैरजिम्मेवार खेलवाड भएको उनको टिप्पणी छ।
