विराटनगर । सोलुखुम्बुको महाकुलुङ गाउँपालिका–१ चेरेम गाउँमुनि निरन्तर पहिरो खस्दा इङ्खु खोलाको बहावमा अवरोध सिर्जना भएको छ।
पहिरोका कारण खोलामा माटो र ढुङ्गा खसिरहेका छन्। हालसम्म खोलाको बहाव पूर्ण रूपमा रोकिएको छैन तर पहिरो खस्ने क्रम जारी रहेकाले खोला थुनिन सक्ने जोखिम बढेको छ।
यस्तै, कोशी प्रदेश सरकारका आन्तरिक मामिला तथा कानूनमन्त्री गोम्बु शेर्पाले चेरेम गाउँमुनिबाट निरन्तर पहिरो खस्दा इङ्खु नदी थुनिएर अस्थायी बाँध बनेको बताएका छन्।
उक्त अस्थायी बाँध फुट्दा पानीको सतह र बहाव एक्कासि बढ्न सक्ने भएकाले इङ्खु खोला, दूधकोशी र सप्तकोशी नदी आसपासका बासिन्दालाई सतर्कता अपनाउन उनले आग्रह गरेका छन्।
उनका अनुसार तत्कालै ठूलो जोखिम निम्तिने सम्भावना नदेखिए पनि त्यस क्षेत्रमा निरन्तर भारी वर्षा भइरहेको र पहिरो जाने क्रम जारी रहेकाले जोखिम हुन सक्ने अवस्था छ।
