काठमाडौं । गृह मन्त्रालयले राष्ट्रिय निजी तथा आवासीय विद्यालय एसोसिएसन नेपाल (एन–प्याब्सन) लाई निलम्बन गरेको छ। मन्त्रालयले शुक्रबार सूचना जारी गर्दै संस्थालाई निलम्बन गरिएको जानकारी दिएको हो।
मन्त्रालयका अनुसार एन–प्याब्सनले सरकारबाट दिइएको निर्देशन पालना नगरेको र संगठनका पदाधिकारीले स्वीकृत विधान तथा संस्थाको मूल उद्देश्यविपरीतका गतिविधि गरेको पाइएको छ।
राष्ट्रिय निर्देशन ऐन, २०१८ को दफा ५ बमोजिम दिइएको निर्देशन पालना नगरेको भन्दै ऐनको दफा ६ को उपदफा (२) अनुसार संस्थालाई निलम्बन गरिएको मन्त्रालयले जनाएको छ।
यसैगरी, मन्त्रालयले एन–प्याब्सनको नाममा कुनै पनि समूह वा गुटले गतिविधि गर्न नपाउने चेतावनी दिएको छ। सूचना जारी भएपछि संस्थाको नाममा हुने कुनै पनि गतिविधि गैरकानुनी हुने र त्यस्ता गतिविधिमा संलग्नलाई प्रचलित कानुनबमोजिम कारबाही गरिने मन्त्रालयले स्पष्ट पारेको छ।
