विराटनगर । सरकारले आगामी कात्तिक १७ र १८ गते देशभरका करिब २१ लाख बालबालिकालाई भिटामिन ‘ए’ क्याप्सुल र २० लाख बालबालिकालाई जुकाको औषधि खुवाउने भएको छ।
स्वास्थ्य सेवा विभागको पोषण शाखाका अनुसार ६ महिनादेखि पाँच वर्षसम्मका बालबालिकालाई भिटामिन ‘ए’ र एक वर्षदेखि पाँच वर्षसम्मका बालबालिकालाई जुकाको औषधि खुवाइनेछ।
नियमित रूपमा कात्तिक २ र ३ गते सञ्चालन हुँदै आएको कार्यक्रम दसैँका कारण स्थगित गरिएको थियो। कार्यक्रमका लागि भिटामिन ‘ए’ क्याप्सुल सबै प्रदेशका स्वास्थ्य आपूर्ति केन्द्रमा पठाइसकिएको छ।
बालबालिकामा कुपोषण तथा स्वास्थ्यसम्बन्धी जटिलताको जोखिम न्यूनीकरण गर्ने उद्देश्यले सरकारले २०५० सालदेखि भिटामिन ‘ए’ र २०५६ सालदेखि जुकाको औषधि खुवाउँदै आएको छ।
कार्यक्रम सञ्चालनका लागि देशभर ५२ हजार महिला स्वास्थ्य स्वयंसेविका र १० हजार स्वास्थ्यकर्मी परिचालन गरिनेछ।
