विराटनगर- सुनसरीको देवानगञ्ज गाउँपालिकाले आगामी आर्थिक वर्ष २०८३/८४ का लागि ५० करोड ५६ लाख रुपैयाँभन्दा बढीको बजेट ल्याएको छ।
बुधबार सम्पन्न २१ औं गाउँसभामा गाउँपालिकाकी उपाध्यक्ष कुमारी विभा यादवले आगामी आर्थिक वर्षका लागि ५० करोड ५६ लाख ५७ हजार ४ सय ३० रुपैयाँको बजेट प्रस्तुत गरेकी हुन्।
विनियोजित बजेटमध्ये चालुतर्फ ३७ करोड २१ लाख ३७ हजार ४ सय ३० रुपैयाँ अर्थात् कुल बजेटको ७३ प्रतिशत र पुँजीगततर्फ १४ करोड २४ लाख ६० हजार रुपैयाँ अर्थात् २७ प्रतिशत खर्च हुने अनुमान गरिएको छ।
गाउँपालिकाले चालु आर्थिक वर्ष २०८२/८३ का लागि विनियोजित ५७ करोड ६४ लाख ६६ हजार ९ सय ८० रुपैयाँ बजेटमाध्ये दश महिनामा ५४.४८ प्रतिशत अर्थात् ३१ करोड ४१ लाख १६ हजार ७ सय ५५ रुपैयाँ मात्र खर्च गरेको छ। चालुतर्फ २४ करोड ८४ लाख २३ हजार ७ सय ५५ रुपैयाँ र पुँजीगततर्फ ६ करोड ५६ लाख ९३ हजार रुपैयाँ खर्च भएको हो।
आगामी आर्थिक वर्षको बजेटमार्फत गाउँपालिकाले सर्वसुलभ तथा गुणस्तरीय स्वास्थ्य सेवा उपलब्ध गराउने, आर्थिक गतिविधिलाई सहज गरी देवानगञ्जवासीको जीवनस्तरमा सुधार ल्याउन भौतिक पूर्वाधार विकास गर्ने, कृषि क्षेत्रमा व्यवसायीकरण, आधुनिकीकरण र विद्युतीय सिँचाइका लागि विद्युत महसुल निःशुल्क गरी उत्पादकत्व वृद्धि गर्ने लगायतका लक्ष्य लिएको छ।
यस्तै जीवनोपयोगी तथा सीपयुक्त शिक्षाको प्रबन्ध मिलाउने, सांस्कृतिक तथा धार्मिक पर्यटनको विकास गर्ने, नतिजामुखी शासकीय व्यवस्था र सुशासन कायम गर्ने, आर्थिक, सामाजिक तथा सांस्कृतिक क्षेत्रमा समतामूलक विकास कार्य गर्ने विषयलाई पनि बजेटको लक्ष्यका रूपमा प्रस्तुत गरिएको छ।
