विराटनगर । मोरङका एक युवाले विदेश गएका कामदारको तलबबाटै रकम कटौती गर्न लगाएर रकम ठगी गर्ने गरेको पाईएको छ ।
विदेशमा रोजगारीको आकर्षक अवसरको प्रलोभन देखाई युवाहरु विदेश पठाएर उनीहरुको तलबबाटै रकम कट्टा गर्न लगाएर मोरङका प्रकाश दाहालले ठगीधन्दा चलाएको पाईएको हो । गन्तव्य मुलुकको स्थानीय म्यानपावर कम्पनीसँगको मिलमत्तोमा विदेश गईसकेका कामदारहरुको तलबबाट सेवाशुल्कको नाममा दोहोरो रकम भुक्तानी गर्न लगाएर दाहालले युवाहरु ठगीरहेको भेटिएको हो । ठगिएको थाहा पाएर झापा र मोरङका पिडित परिवारले प्रहरीमा निवेदन दिएपछि उक्त घटना बाहिर आएको हो ।
मोरङको सुन्दरहरैंचा घर बताउने अन्दाजी वर्ष ३८ का प्रकाश दाहालले वैदेशिक रोजगारीमा पठाइदिने भन्दै विभिन्न प्रलोभन देखाई युवाहरूलाई ठगी गरेको आरोपमा जिल्ला प्रहरी कार्यालय मोरङमा घटना दर्ता भएको हो । आकर्षक तलब र विभिन्न सेवा-सुविधासहित माल्दिभ्स, सिंगापुर र युरोपका विभिन्न देशमा रोजगारीको अवसर मिलाईदिने आश्वासन दिँदै मोटो रकम असुलेर युवाहरुलाई ठगी गर्ने गरेको भेटिएपछि पिडित पक्षले प्रहरीमा जाहेरी दिएका हुन् । दाहालले सेवाशुल्क भन्दै युवाहरूसँग चर्को रकम असुलेर भनेजस्तो काममा नलगाईदिएर सम्पर्कविहीन भएको पिडितका परिवारले बताएका छन् ।
परिवारका अनुसार सम्बन्धित देशको म्यानपावर कम्पनीलाई पनि रकम बुझाउनुपर्ने भन्दै दाहालले युवाहरुसँग मोटो रकम असुली गर्छन् । तर कामदारलाई विदेश पठाईसकेपछि सम्बन्धित देशको एजेन्ट वा म्यानपावर कम्पनीलाई कुनैपनि रकम नबुझाई सम्पर्कविहिन हुन्छन् । गन्तव्य मुलुकको म्यानपावर कम्पनीले पाउनुपर्ने रकम नपाएपछि सेवाशुल्क बापतको उक्त रकम अन्त्यमा रोजगारीको शिलशिलामा विदेश गएका कामदारको तलबबाट मासिक रुपमा काटिन्छ । दाहालले यसरी नै मोरङ, सुनसरी र झापाका धेरै २० देखि ४० वर्ष उमेर समुहका धेरै सर्वसाधारणलाई ठगेको भेटिएको छ ।
वैदेशिक रोजगारीको प्रक्रिया सुरु भएर आफ्नो गन्तव्य मुलुक पुगुन्जेलसम्म सबै ठीकै देखिएपनि विदेश पुगिसकेपछि कामदारहरु समस्यामा पर्ने गरेको पिडित परिवारको गुनासो छ । विदेशमा रहेका युवाहरु आर्थिक संकटमा पर्नुका साथै मानसिक तनावको शिकार समेत भएको उनीहरुको भनाई छ ।
दाहालमार्फत वैदेशिक रोजगारीमा गएका एक युवा रमेश पनि हुन् । विराटनगर–५ का वर्ष २४ का रमेश मण्डल (परिवर्तित नाम) ले पनि दुई महिनाअघि वेटरमा काम गर्न जाने भनी प्रकाश दाहालसँग छरछिमेकसँगको चिनजानमार्फत् सम्पर्क गरेका थिए । दाहालले माल्दिभ्सको गोल्ड कम्पनी प्रा.लि.मा रोजगारीको अवसर रहेको भन्दै मासिक ६,०००/– माल्दिभियन रुफिया तलबमा काम गर्न मण्डललाई माल्दिभ्स पठाईदिए । त्यसबापत टिकट, श्रम तथा मेडिकलबाहेक भिषा र सेवाशुल्क बापतको रकम भन्दै उनीबाट दाहालले कुल १ लाख ८० हजार रुपैयाँ लिए । त्यसमा माल्दिभ्सको म्यानपावर कम्पनीलाई भिषा र सेवा शुल्कबापत् १ लाख ४० हजार रुपैयाँ बुझाउनुपर्ने र बाँकी रकम आफुले काम गरेबापत लिने सहमति थियो । टिकट, श्रम र मेडिकल चेकजाँचको रकम मण्डल आफैले व्यहोरे । तर, हाल उनी विदेश गईसकेको दुईमहिना बितिसक्दा समेत दाहालले सम्बन्धित म्यानपावरलाई भुक्तानी गर्नुपर्ने रकम भुक्तानी गरेका छैनन् । उक्त बक्यौता रकम हाल मण्डलको तलबबाट मासिक ३० हजारका दरले कट्टा भईरहेको उनले बताएका छन् । बुझ्दै जाँदा दाहालले यसरी अन्य थुप्रै युवाहरुलाई फसाएको भेटिएको उनको भनाई छ । ‘यहाँ आएर बुझ्दा उनीबाट यसरी ठगिने अन्य धेरै छन । काम अनुसार प्रतिव्यक्ति ३ लाख रुपैयाँसम्म संकलन गरिएको छ ,’ मण्डलले भने, ‘मलाई वेटरको काम त दिईएको छ । तर, कम्पनीले टोईलेट समेत सफा गर्न लगाउँछ । यहाँ नेपालको दुतावास नभएका कारण उजुरी गर्न समेत गाह्रो छ ।’
मोरङ प्रहरीमा जाहेरी परेपछि झापाको मेचीनगर–१३ बस्ने ३८ वर्षीय सुरज कुमार कार्की (परिवर्तित नाम) पनि दाहालसँगै यसरी नै ठगिएको खुलेको छ । आफ्नो नाम प्रकाश दाहाल बताउने उनले युवाहरुसँग रकम संकलन गर्न विदुर दाहालको नाममा रहेको सप्तकोशी डेभलपमेन्ट बैंकको खाता प्रयोग गर्ने गरेको उनले बताएका छन् । उनको सक्कली नाम पनि प्रकाश दाहाल नभई विदुर दाहाल नै हुनसक्ने पिडित कार्कीको आशङ्का छ । उनले भने, ‘सुरुसुरुमा कुराकानी हुँदा दाहालले आफ्नो नाम इन्द्र बताएका थिए । पछि प्रकाश दाहाल भने । उनको भारतको दिल्लीमा ब्रर्दश म्यानपावर नामको कम्पनी समेत छ । तर, आधिकारिक रुपमा दर्ता भने छैन ।’
कार्कीपनि दाहालमार्फत दुई महिनाअघि हाउसकिपिङको रुपमा काम गर्न माल्दिभ्स गएका थिए । उनको तलब ४०० डलर भनिएको थियो । तलबपनि डलरमै भुक्तानी गरिने बताईएको थियो । तर, हाल उनले आफ्नो तलब रुफियामा पाईरहेका छन् । जसमा मासिक २०० डलर बराबरको रकम उनको तलबबाट कट्टा हुँदै आईरहेको छ । विदेश गएको दुई महिना बितिसक्दा पनि सम्बन्धित एजेन्टलाई बुझाउनुपर्ने १ हजार अमेरिकी डलर बराबरको रकम दाहालले भुक्तानी नगरेको कारण उक्त रकम आफ्नो तलबबाट कट्टा भईरहेको कार्कीले बताएका छन् । ‘तलब यहाँको लोकल करेन्सीमा पाईरहेको छु, कम्पनीले डलरमै दिन्छ भनिएको थियो,’ उनले भने, ‘रुफियामा तलब पाउँदा नेपाल पठाउन निकै गाह्रो हुने रहेछ । ब्ल्याकमा डलरमा एक्सचेन्ज गरेर नेपाल पठाउनुपर्छ । ५० हजार पठाउँदा झण्डै १० हजार घाटा लाग्छ ।’
दाहालमार्फत उनीहरु जस्ता अन्य थुप्रै युवाका साथसाथै सुनसरीको इटहरीका अधिकांश म्यानपावर कम्पनीहरुसमेत ठगीमा परेको बताईएको छ । एकचोटि सम्पर्कविहिन भएपछि उनीसँग पुनः सम्पर्क गर्न निकै कठिन रहेको पिडितका परिवारले बताएका छन् । प्रायः उनले प्रयोग गर्ने नम्बर बन्द नै रहने गरेको उनीहरुको भनाई छ । प्रहरीमा जाहेरीपछि मोरङ प्रहरीले घटनाको अनुसन्धान सुरु गरेको छ । उनको खोजी कार्य जारी रहेको मोरङ प्रहरीले जनाएको छ ।
समाचारका सन्दर्भमा बिषयवस्तु बुझ्न दाहालसँग उनले प्रयोग गर्ने ९८२५९०८३३२ र ९७०४५१०७२९ नम्बरमा सम्पर्क गर्दा भने उनीसँग सम्पर्क हुन सकेन ।
