काठमाडौं । राष्ट्रिय स्वतन्त्र पार्टी (रास्वपा)ले आगामी स्थानीय तह निर्वाचनका लागि पार्टीका तर्फबाट उम्मेदवार बन्न ‘क्यान्डिडेट क्लब’ र ‘लिडरसिप एकेडेमी’ बाट उत्तीर्ण हुनैपर्ने व्यवस्था लागू गर्ने निर्णय गरेको छ।
पार्टी केन्द्रीय कार्यालयमा बसेको सचिवालय बैठकले यस्तो निर्णय गरेको जानकारी प्रवक्ता मनिष झाले दिएका हुन्।
पार्टीका अनुसार उम्मेदवारका आकांक्षी धेरै हुने सम्भावना रहेकाले छनोट प्रक्रियालाई व्यवस्थित र पारदर्शी बनाउन ‘क्यान्डिडेट क्लब’ अवधारणा अघि बढाइएको हो। यसअघि संसदीय दलको बैठकले उम्मेदवार छनोट रूपरेखा तयार गर्न समिति गठन गरिसकेको छ।
उक्त समितिको संयोजकमा विपिनकुमार आचार्य रहेका छन् भने सचिवमा रामकुमार (आरके) ढुंगाना तोकिएका छन्। समितिमा समिक्षा बास्कोटा, केपी खनाल, कामिनी चौधरी, रामकृष्ण भट्टराई र डिल्लिश्वर कार्की (रोहन) सदस्यका रूपमा रहेका छन्।
रास्वपाले आगामी २०८४ सालमा हुने स्थानीय तह निर्वाचनलाई लक्षित गर्दै अहिलेबाटै तयारी सुरु गरेको जनाएको छ। २०७९ सालमा सम्पन्न स्थानीय निर्वाचनको पाँच वर्षे कार्यकाल २०८४ मा सकिँदैछ।
यसैबीच, पार्टीले स्थानीय तह र प्रदेश सभा निर्वाचन एकै समयमा गराउने लक्ष्यसहित रणनीति बनाउँदै आवश्यक संरचना र प्रक्रियाहरू अघि बढाएको छ। यसअघि उम्मेदवार छनोट रूपरेखा २०८३ को मस्यौदा प्रतिवेदन पनि पार्टी सभापति रवि लामिछानेलाई हस्तान्तरण गरिएको थियो।
