काठमाडौं । डा. स्वर्णिम वाग्लेले मुलुकको अर्थतन्त्रमा देखिएको ‘नीतिगत कब्जा’ र ‘लुटतन्त्र’ अन्त्य गर्दै सुशासन स्थापना गर्नु सरकारको मुख्य प्राथमिकता रहेको बताएका छन्।
आर्थिक पत्रकार समाज (सेजन)ले राजधानीमा आयोजना गरेको कार्यक्रममा बोल्दै उनले सरकार सुशासनका मामिलामा ‘निर्मम’ रूपमा अघि बढ्ने स्पष्ट पारे। उनका अनुसार सुशासनलाई म्याक्रो र माइक्रो दुई तहमा विभाजन गरेर सुधारका काम अघि बढाइएको छ।
म्याक्रो तहमा नीतिगत तथा संस्थागत कब्जा अन्त्य गर्दै अर्थतन्त्रलाई ‘क्लेप्टोक्रेसी’ र ‘लुटतन्त्र’ बाट बाहिर ल्याउने लक्ष्य रहेको उनले बताए। “हामीले सुशासनलाई म्याक्रो र माइक्रो दुवै तहमा हेरेका छौं, र अहिले सुधारको मोडमा छौं,” उनले भने।
माइक्रो तहमा भने सेवा प्रवाह सुधार गर्ने, सरकारी कार्यालयमा लाइन बस्न नपर्ने, घुस दिनु नपर्ने र डिजिटल माध्यमबाट सेवा उपलब्ध गराउने व्यवस्था सुनिश्चित गर्न सरकार लागेको उनको भनाइ थियो।
अर्थमन्त्री वाग्लेले अपराध नियन्त्रणका सन्दर्भमा निजी क्षेत्रलाई पनि सन्देश दिँदै इमान्दार व्यवसायीलाई नआत्तिन आग्रह गरे। “गल्ती नगर्ने, कर तिर्ने र रोजगारी सिर्जना गर्ने उद्यमीहरूलाई कुनै डर हुनुपर्दैन,” उनले भने, “तर उद्यमीको आवरणमा अपराध गर्नेहरूले उन्मुक्ति पाउने छैनन्।”
उनले निजी क्षेत्रलाई ७० खर्बभन्दा ठूलो अर्थतन्त्रको संवाहक र ७ प्रतिशत आर्थिक वृद्धिको मुख्य सारथीको रूपमा चित्रण गरे।
