काठमाडौं – राष्ट्रिय स्वतन्त्र पार्टीका सांसद विश्वराज पोखरेलले विद्यालयका प्रधानाध्यापकलाई थर्काएको भिडियो सार्वजनिक भएपछि माफी मागेका छन्।
ओखलढुङ्गामा रहेको चण्डेश्वरी माध्यमिक विद्यालयमा भएको घटनाको भिडियो सामाजिक सञ्जालमा भाइरल भएपछि उनले प्रेस विज्ञप्ति जारी गर्दै आफ्नो व्यवहारप्रति खेद व्यक्त गरेका हुन्। उनले आफ्नो बोली र व्यवहारमा संयमता नदेखिएको स्वीकार गर्दै कसैको आत्मसम्मानमा चोट पुगेको भए क्षमा मागेका छन्।
पोखरेलले भिडियो अपूर्ण सन्दर्भमा काटछाँट गरेर प्रस्तुत गरिएको दाबी गरे पनि सार्वजनिक पदमा रहँदा आफूले अझ धैर्य र मर्यादा देखाउनुपर्ने स्वीकार गरेका छन्।
उक्त घटनामा उनी विद्यालय पुग्दा स्वागत गर्न नआएको भन्दै प्रधानाध्यापकमाथि आक्रोशित भएका थिए। भाइरल भिडियोमा उनले आफू विशिष्ट श्रेणीको पूर्वकर्मचारी भएको उल्लेख गर्दै प्रधानाध्यापकलाई प्रश्न गरेको देखिन्छ।
घटनापछि सामाजिक सञ्जालमा चर्को आलोचना भएपछि उनले पार्टी, विद्यालय परिवार तथा आम नागरिकप्रति क्षमायाचना गर्दै आगामी दिनमा थप जिम्मेवार र मर्यादित व्यवहार गर्ने प्रतिबद्धता जनाएका छन्।
