काठमाडौं । राष्ट्रिय स्वतन्त्र पार्टी (रास्वपा) ले भूपदेव शाह लाई महामन्त्री बनाउने तयारी गरेको छ।आज बस्ने केन्द्रीय समिति बैठकमा शाहलाई महामन्त्री बनाउने प्रस्ताव अघि बढाइने स्रोतले जनाएको छ। “उहाँलाई महामन्त्रीका रूपमा प्रस्ताव पेश गर्ने कार्यसूची छ र आजकै बैठकबाट पारित हुने सम्भावना छ,” स्रोतले जनाएको छ।
काठमाडौं महानगरपालिकाका मेयर बालेन्द्र शाह (बालेन) रास्वपामा प्रवेश गर्दा भूपदेव पनि उनीसँगै सचिवालयमा संलग्न थिए।
यसअघि भएको सहमतिअनुसार महामन्त्रीमा सुनिल लम्साल रहेका थिए भने भूपदेव सहमहामन्त्री थिए। लम्सालले मन्त्रीको जिम्मेवारी सम्हालेपछि भूपदेवलाई महामन्त्री बनाउने तयारी गरिएको हो।
बालेनका निकट मानिने भूपदेव प्रमुख स्वकीय सचिवका रूपमा काम गरिसकेका छन्। रास्वपासँग एकीकरण प्रक्रियाका क्रममा उनी केन्द्रीय सदस्य बनेका थिए।
गत फागुन २१ मा सम्पन्न प्रतिनिधिसभा निर्वाचनमा उनी अछाम क्षेत्र नम्बर २ बाट उम्मेदवार बनेका थिए, तर निर्वाचनमा पराजित भएका थिए।
