काठमाडौं । सुधन गुरुङले आफूले विभिन्न सेयर बजारमा गरेको लगानीको स्रोत ऋणबाट जुटाएको स्पष्टिकरण दिएका छन्।विवादित पृष्ठभूमिका व्यवसायीसँग साँठगाँठ रहेको भन्ने विषयमा विभिन्न सञ्चारमाध्यममा उठेका प्रश्नको जवाफ दिँदै उनले बैंकमार्फत भएको कारोबारको सबै विवरण देखिने बताएका छन्।
“बैंकबाट गएको पैसाको सबै हिसाब हुन्छ। कहिले गयो, कहाँ गयो, कसलाई गयो सबै देखिन्छ। यस्तो हिसाब हुने पैसा कसरी लुकाउने ? कहाँ लुकाउने ?” उनले भनेका छन्।
लगानीको स्रोतबारे उठेका प्रश्नमा उनले विसं २०८० भदौ २९ गतेको लिखित तमसुक रेकर्डमा रहेको उल्लेख गरेका छन्। “मैले लगानी गरेको रकम ऋण (कर्जा) मार्फत जुटाइएको हो, र त्यसको लिखित तमसुक मिति २०८०/०५/२९ को हो,” उनले भने।
उनका अनुसार उक्त ऋण रकम बैंकिङ च्यानलमार्फत आएको र सोही रकम लगानीमा प्रयोग गरिएको हो। “पैसा कहाँबाट आयो भन्ने कुरा अनुमानको होइन, कागज र बैंक रेकर्डले प्रमाणित गर्ने विषय हो,” उनले स्पष्ट पारेका छन्।
