काठमाडौं । सर्वोच्च अदालतले नेकपा (एमाले) का अध्यक्ष एवं पूर्वप्रधानमन्त्री केपी शर्मा ओली तथा नेपाली कांग्रेसका नेता एवं पूर्व गृहमन्त्री रमेश लेखकलाई थुनामुक्त गर्न माग गर्दै दायर गरिएको बन्दीप्रत्यक्षीकरणको रिट निवेदनमा सोमबार (आज) फेरि सुनुवाइ गर्ने भएको छ।
अदालतका प्रवक्ता अर्जुनप्रसाद कोइरालाका अनुसार आइतबार न्यायाधीश विनोद शर्मा र सुनिलकुमार पोखरेलको इजलासमा सुनुवाइ सुरु भए पनि समय अभावका कारण हेर्दाहेर्दैमा राखिएको थियो।
अध्यक्ष ओलीकी पत्नी राधिका शाक्य र नेता लेखककी पत्नी यशोदा लेखकले यही चैत १५ गते गैरकानुनी थुनामा राखिएको उल्लेख गर्दै थुनामुक्त गर्न माग गरी बन्दीप्रत्यक्षीकरणको रिट निवेदन दायर गरेका थिए।
यसअघि न्यायाधीश मेघराज पोखरेलको इजलासले अध्यक्ष ओलीको र न्यायाधीश कुमार रेग्मीको इजलासले नेता लेखकको बन्दीप्रत्यक्षीकरण रिट निवेदनमा चैत १६ गते कारण देखाउ आदेश जारी गरेका थिए।
रिट निवेदनमा गत भदौ २३ र २४ गतेको घटनासम्बन्धी जाँचबुझ आयोगको प्रतिवेदनको सिफारिसका आधारमा पक्राउ गर्नु र थुनामा राख्नु गैरकानुनी भएको दाबी गरिएको छ।
