काठमाडौं – सर्वोच्च अदालतमा रवि लामिछाने विरुद्धको सम्पत्ति शुद्धीकरण मुद्दा फिर्ता लिने निर्णयविरुद्ध दायर रिटमाथि आज (मंगलबार) पनि निरन्तर सुनुवाइ हुने भएको छ।
न्यायाधीशद्वय विनोद शर्मा र अब्दुल अजिज मुसलमानको संयुक्त इजलासमा सुनुवाइ भइरहेको उक्त रिट सोमबार पनि नसकिएपछि ‘हेर्दाहेर्दै’मा राखिएको थियो। यसअघि लगातार चार दिनसम्म सुनुवाइ भइसकेको छ। सोमबार रिट निवेदकतर्फबाट वरिष्ठ अधिवक्ता दिनेश त्रिपाठीसहितले बहस गरेका थिए। अब प्रतिवादी पक्षबाट बहस हुने क्रम रहेको छ।
महान्यायाधिवक्ताको कार्यालयले लामिछानेविरुद्धको संगठित अपराध र सम्पत्ति शुद्धीकरणसम्बन्धी अभियोग फिर्ता लिने निर्णय गरेपछि त्यसलाई बदर गर्न माग गर्दै युवराज सफल, दिनेश त्रिपाठी र आभास रेग्मीले रिट दायर गरेका हुन्।
यसअघि सर्वोच्चले महान्यायाधिवक्ताको कार्यालयलाई माघ २ गतेको निर्णयसहित सम्बन्धित कागजातहरू पेश गर्न आदेश दिएको थियो। सोही आधारमा सुनुवाइ जारी रहेको हो।
लामिछाने विभिन्न सहकारी ठगी प्रकरणमा मुछिएका थिए, जहाँ उनीविरुद्ध सम्पत्ति शुद्धीकरण र संगठित अपराधसम्बन्धी मुद्दासमेत दायर गरिएको थियो। पछि महान्यायाधिवक्ताको कार्यालयले अभियोगपत्र संशोधन गर्दै ती कसुर हटाउने निर्णय गरेको थियो, जसले कानुनी क्षेत्रमा बहस र विवाद सिर्जना गरेको छ।
