काठमाडौं – राष्ट्रिय स्वतन्त्र पार्टी (रास्वपा) ले चैत १३ गते प्रधानमन्त्री नियुक्ति गर्ने तयारी गरेको छ। पार्टीका महामन्त्री कवीन्द्र बुर्लाकोटीका अनुसार यससम्बन्धी जानकारी संवैधानिक निकायहरूमा पठाइसकिएको छ।उनका अनुसार प्रधानमन्त्री चयनअघि नै पार्टीले संसदीय दलको नेता टुंग्याउनेछ। प्रधानमन्त्रीमा बालेन्द्र शाह लाई अघि सार्ने निर्णय यसअघि नै भइसकेको छ।
दरबारमार्गस्थित होटल रोयल सिंगेमा सभापति रवि लामिछाने, वरिष्ठ नेता बालेन्द्र शाह र उपसभापतिद्वय स्वर्णिम वाग्ले तथा डोलप्रसाद अर्यालबीच भएको छलफलमा बढीमा १८ सदस्यीय मन्त्रिमण्डल बनाउने तयारी भएको जनाइएको छ। रास्वपा स्रोतकाअनुसार सम्भावित मन्त्रिमण्डलमा लामिछाने पक्षबाट १० र बालेन पक्षबाट ८ जना मन्त्री रहने गरी छलफल भएको छ। प्रधानमन्त्रीको शपथकै दिन केही मन्त्रीहरूले पनि शपथ लिने तयारी गरिएको छ भने बाँकी मन्त्रालयहरू योग्यता, क्षमता र दक्षताका आधारमा टुंग्याइने बताइएको छ।
पार्टीभित्र उपसभापति अर्याललाई गृहमन्त्री तथा वाग्लेलाई अर्थमन्त्री बनाउने चर्चा छ। त्यस्तै परराष्ट्र मन्त्रालयका लागि शिशिर खनाल र अमरेशकुमार सिंह, कानुनका लागि सोविता गौतम, पर्यटनका लागि धनञ्जय रेग्मी, विराजभक्त श्रेष्ठ र सुम्निमा उदासको नाम चर्चामा छन्।
यसैगरी शिक्षामन्त्रीमा सस्मित पोखरेल, सञ्चारमा जगदीश खरेल र मनिष झा, भौतिक पूर्वाधारमा सुधन गुरुङ तथा स्वास्थ्यमा तोसिमा कार्की र लेखजंग थापाको नाम चर्चामा रहेको छ।
रास्वपाले यसपटक झण्डै दुईतिहाइ नजिकको सिट जित्दै सरकार गठनको तयारी गरेको छ। यसैबीच निर्वाचन आयोगले समानुपातिकतर्फका सांसदलाई प्रमाणपत्र वितरण गरिसकेको छ भने संघीय संसद सचिवालय ले सर्वदलीय बैठक आह्वान गरिसकेको छ।
