मोरङ । संसदीय निर्वाचनमा रास्वपाकी रुबिना आचार्यसँग सर्मनाक हार खेपेका कांग्रेस नेता डा. शेखर कोइरालाले चुनावी खर्च विवरण सार्वजनिक गरेका छन् ।
मोरङ ६ मा लगातार तेस्रो पटक चुनाव लडेका कोइराला आफूभन्दा ४४ वर्ष कान्छी रुबिनासँग ४२ हजारभन्दा बढी मतान्तरले पराजित भएका थिए ।
उनै कोइरालाले यो चुनावमा २२ लाख ३१ हजार अठासी रुपैयाँ खर्च भएको विवरण निर्वाचन कार्यालयमा बुझाएका छन् । जसअनुसार सबैभन्दा बढी १६ लाख रुपैयाँ खर्च प्रचार–प्रसार सामग्री छपाइमा भएको छ । जबकि, शेखरलाई भारी मतान्तरले पराजित रुबिनाले भने १२ लाख रुपैयाँमात्र चुनावमा खर्चिएकी छन् ।
३१ वर्षीया रुबिनाले १२ लाख चालीस हजार सात सय छ रुपैयाँ खर्च गरेकी हुन् । जसअनुसार उनले सबैभन्दा बढी तीन लाख रुपैयाँ विद्युतीय प्रचारप्रसार फोटोकपी तथा भिडियोग्राफीमा खर्चिएकी हुन् ।
