कोविराटनगर । हालै सम्पन्न संसदीय निर्वाचनमा नेपालको कलिलो पार्टीमध्येको एक रास्वपाले अभूतपूर्व नतिजा ल्यायो । प्रत्यक्षतर्फ १२५ सिट जितेर सुविधाजनक संसदीय अंकगणितको मत हासिल गरेको रास्वपा समानुपातिकको जारी गणनामा पनि निकै अघि छ । उसले समानुपातिकमा सदर मतको झन्डै आधा मत पाएको छ ।
प्रत्यक्षमा रास्वपाले दुई तिहाइ बढी सिट हासिल गरेको छ । समानुपातिकमा पनि बहुमत सिटको हाराहारीमा छ । यसरी रास्वपाले दुई तिहाइभन्दा बढी सिट हासिल गर्दा अघिल्लो संसद्का ठुला दल नेपाली कांग्रेस, नेकपा (एमाले) लगायतका दलको उपस्थिति प्रतिनिधि सभामा यस पटक निकै कमजोर बनेको छ ।
प्रत्यक्षमा नेपाली कांग्रेसले अग्रता कायमसहितको नतिजा हासिल गरेमा बढीमा १८, एमालेले नौ र नेपाली कम्युनिस्ट पार्टीले सात सिटमा जित हासिल गरेका छन् । श्रम संस्कृति पार्टीले तीन सिट जित्दा राष्ट्रिय प्रजातन्त्र पार्टीले एक र स्वतन्त्रले एक सिटमा जित हासिल गरेका छन् ।
समानुपातिकको जारी गणनाअनुसार रास्वपाबाहेक कांग्रेस, एमाले, नेकपा, श्रम संस्कृति पार्टी र राष्ट्रिय प्रजातन्त्र पार्टीले कानुन अनुसारको थ्रेसहोल्ड कटाएका छन् । तथापि, समानुपातिक तर्फको मतगणना जारी रहेका कारण अहिले नै संघीय संसदमा कसको कति सिट हुन्छ भन्ने तय भइसकेको छैन ।
प्रतिनिधि सभा सदस्य निर्वाचन ऐन २०७४ को दफा ६० (११) को व्यवस्था अनुसार सदर मतको तीन प्रतिशत कटाउने दलले मात्र समानुपातिकमा सिट पाउने व्यवस्था छ ।
राष्ट्रिय दलको मान्यता पाउन भने प्रत्यक्षतर्फ पनि कम्तीमा एक सिट जित्नुपर्ने छ । समानुपातिक निर्वाचन प्रणालीतर्फको कुल सदर मतको तीन प्रतिशत वा सोभन्दा बढी मत प्राप्त गर्ने दलको तर्फबाट मात्र उम्मेदवार निर्वाचित हुनेछन् ।
