काठमाडौं – प्रतिनिधिसभा निर्वाचन सकिएसँगै वरिष्ठ पत्रकार राजेन्द्र बानियाँले सामाजिक सञ्जालमार्फत केपी शर्मा ओली लाई लक्षित गर्दै लेखेको स्टाटस यतिबेला चर्चामा आएको छ।
उनले “फाल्गुन २१, एमाले र ओली” शीर्षकमा लेख्दै फाल्गुन २१ गतेसँग जोडिएका ऐतिहासिक संयोगहरू उल्लेख गरेका छन्। बानियाँले प्रधानमन्त्रीसमेत रहेका एमाले अध्यक्ष ओलीले पहिले नै दुई संयोग उल्लेख गरेको भन्दै आफूले थप दुई संयोग जोडेको बताएका छन्।
उनका अनुसार २०२९ साल फाल्गुन २१ गते बिहीबार झापाको सुखानीमा चर्चित सुखानी काण्ड भएको थियो। त्यस्तै २०५४ साल फाल्गुन २१ गते बिहीबार नै नेपाल कम्युनिस्ट पार्टी (एमाले) विभाजन भएको उनले स्मरण गरेका छन्।
त्यसैगरी २०७६ साल फाल्गुन २१ गते केपी शर्मा ओली ले मिर्गौला पुनःप्रत्यारोपणपछि नयाँ जीवन पाएको प्रसंगसमेत उनले उल्लेख गरेका छन्।
यी सबै घटनाको सन्दर्भ जोड्दै बानियाँले “आज २०८२ फाल्गुन २१ गते बिहीबार, एमालेको जीवनमा र ओलीले कहिल्यै नबिर्सने दिन हुनेछ” भन्ने टिप्पणी गरेका छन्।
उनले आफ्नो स्टाटसको अन्त्यमा “मलाई गाली या ताली जे भए पनि मञ्जुर छ, तर एमालेजन र ओलीले यो स्टाटस र मलाई बिर्सने छैनन्” भन्ने उल्लेख गरेका छन्।
निर्वाचन परिणामको पूर्वसन्ध्यामा आएको उक्त टिप्पणीलाई धेरैले राजनीतिक संकेतका रूपमा हेरेका छन् भने सामाजिक सञ्जालमा यसबारे व्यापक बहससमेत सुरु भएको छ।
