काठमाडौं । चर्चित अभिनेता सुनिल थापाको पोस्टमार्टम रिपोर्ट सार्वजनिक भएको छ। त्रिभुवन विश्वविद्यालय शिक्षण अस्पताल महाराजगन्जमा आइतबार बिहान गरिएको पोस्टमार्टम रिपोर्टअनुसार थापाको हृदयघातका कारण निधन भएको पुष्टि भएको छ।
अस्पताल स्रोतका अनुसार मुटुको नसा ब्लक भएर हृदयघात हुँदा उनको मृत्यु भएको देखिएको छ। ‘हृदयघात भएर मुटुको नसा ब्लक भएका कारण मृत्यु भएको पाइएको छ,’ एक चिकित्सकले जानकारी दिएका छन्।
पोस्टमार्टम प्रक्रिया सम्पन्न भएपछि थापाको शव अस्पतालबाट लगिएको छ। उनको पार्थिव शरीर श्रद्धाञ्जलीका लागि चलचित्र विकास बोर्डमा राखिने बताइएको छ।
६८ वर्षीय थापाको शनिबार बिहान थापाथलीस्थित नर्भिक अस्पतालमा निधन भएको थियो। बिहान स्वास्थ्यमा समस्या देखिएपछि उनलाई अस्पताल पुर्याइएको थियो।
