काठमाडौँ– राष्ट्रिय स्वतन्त्र पार्टी (रास्वपा) ले संघीय निर्वाचनलाई लक्षित गर्दै निर्वाचन सम्पादन समिति गठन गरेको छ। पार्टीको केन्द्रीय समिति बैठकको निर्णयअनुसार उपसभापति डोलप्रसाद अर्यालको संयोजकत्वमा ५१ सदस्यीय समिति गठन गरिएको हो।
रास्वपाका अनुसार आगामी फागुन २१ गते हुने प्रतिनिधि सभा सदस्य निर्वाचनमा दुई तिहाइ मत प्राप्त गरी सक्षम सरकार गठन गर्ने लक्ष्यसहित समिति बनाइएको हो। साथै देशको समग्र विकास, आन्तरिक सबलता र अन्तर्राष्ट्रिय सम्मान अभिवृद्धि गर्ने उद्देश्य पनि समितिको कार्यदिशामा समेटिएको छ।
समितिको सदस्य सचिवमा शंकर श्रेष्ठ रहेका छन्। निर्वाचन व्यवस्थापनलाई प्रभावकारी बनाउन सातै प्रदेशमा प्रदेश संयोजक तोकिएको छ भने निर्वाचनसम्बन्धी कार्यलाई थप व्यवस्थित गर्न तीन वटा विशेष उपसमिति पनि गठन गरिएको छ।
रास्वपाले निर्वाचन अभियानलाई योजनाबद्ध, सशक्त र प्रभावकारी ढंगले अघि बढाउन यो समिति महत्वपूर्ण हुने विश्वास व्यक्त गरेको छ।
