काठमाडौं — विवादित सेयर कारोबारी दीपेन्द्र अग्रवाल नेकपा एमालेमा प्रवेश गरेका छन्। जनता समाजवादी पार्टी, नेपालका केन्द्रीय सदस्यसमेत रहेका अग्रवाललाई शनिबार एमाले मुख्यालय च्यासलमा आयोजित कार्यक्रममा एमाले अध्यक्ष केपी शर्मा ओलीले पार्टीमा स्वागत गरेका हुन्। ओलीले अग्रवाललाई खादा र टीका लगाएर एमालेमा प्रवेश गराएका थिए।
अग्रवाल यसअघि नेपाल प्रहरीको केन्द्रीय अनुसन्धान ब्युरो (सीआईबी) बाट पक्राउ परिसकेका व्यक्ति हुन्। सीआईबीले उनलाई सेयर मूल्य कृत्रिम रूपमा बढाएको, झुटो कारोबार गरेको तथा मूल्य प्रभावित कसुरमा पक्राउ गरेको थियो।
उनको गतिविधिबारे नेपाल धितोपत्र बोर्डले पनि अनुसन्धान गरी कारबाही प्रक्रिया अघि बढाएको थियो। करिब १० दिन हिरासतमा राखेर अनुसन्धान गरिएपछि अग्रवाल हाजिर जमानीमा रिहा भएका थिए।
अग्रवालले सस्तोमा सेयर खरिद गर्ने भ्रामक प्रचार गरी मूल्य बढाएर बिक्री गर्ने गर्दै आएको आरोप छ। उनी आफूले सेयर खरिद गरिसकेपछि सामाजिक सञ्जालमार्फत लगानीकर्तालाई सेयर किन्न उक्साउने, निश्चित मूल्यसम्म पुर्याइदिने भन्दै झुटा आश्वासन दिने गर्थे।
लगानीकर्ताले सेयर खरिद गर्न थालेपछि भने अग्रवालले आफ्ना सेयर बिक्री गर्ने गरेको पाइएको थियो। सोही विषयमा उजुरी परेपछि धितोपत्र बोर्डले अध्ययन गर्दा उनले झुटा कारोबार गरेको निष्कर्ष निकालेको थियो।
सेयर बजारमा झुटा कारोबार, भ्रामक सूचना फैलाएर मूल्य बढाउने तथा सामाजिक सञ्जालको दुरुपयोग गरेको विषयमा अनलाइनखबरले निरन्तर समाचार प्रकाशित गर्दै आएको थियो।
यस्तै, अग्रवालले अन्य व्यक्तिका कारोबार खाता आफैं सञ्चालन गर्ने, धितोपत्र ब्रोकरसँग लिनुपर्ने पैसा असुल गर्ने तर तिर्नुपर्ने रकमका विषयमा विवाद सिर्जना गर्दै भुक्तानी नगर्ने गरेको आरोप पनि छ। एक कारोबार खाताको रकम अर्को व्यक्तिको खातामा ट्रान्सफर गर्ने काम गरेपछि समेत धितोपत्र बोर्डमा उजुरी परेको थियो।
