काठमाडौं — नेपाली कांग्रेसका निवर्तमान सभापति शेरबहादुर देउवा नेतृत्वको समूहले राष्ट्रिय भेलाको तयारी सुरु गरेको छ। विशेष महाधिवेशनबाट किनारा लागेको उक्त समूह ११ माघमा हुने राष्ट्रिय सभा निर्वाचनपछि भेला गर्ने तयारीमा जुटेको हो।
राष्ट्रिय भेलाको तयारीका लागि निवर्तमान कार्यवाहक सभापति पूर्णबहादुर खड्का समूहका नेताहरूसँग परामर्शमा छन्। खड्कासँग शनिबार भेट गरेका एक निवर्तमान केन्द्रीय सदस्यका अनुसार समूहले राष्ट्रिय भेलाको तयारी अघि बढाएको छ।
पुसमा सम्पन्न विशेष महाधिवेशनपछि विकसित पार्टीको आन्तरिक राजनीतिक अवस्था र त्यसअघिको परिस्थितिबारे समूहका नेता–कार्यकर्तालाई जानकारी गराउने तथा आगामी रणनीति तय गर्ने उद्देश्यले भेलाको तयारी भइरहेको उनले बताए।
‘राष्ट्रिय सभा निर्वाचनपछि भेला गर्ने भन्ने छ। आज बिहान कार्यवाहक सभापतिसँग कुरा भएको थियो,’ ती नेताले अनलाइनखबरसँग भने, ‘सबैलाई एउटा सन्देश त दिनुपर्यो।’
हालसम्म भेलाको मिति भने तय भइनसकेको उनले जानकारी दिए। ‘समय फिक्स भइसकेको अवस्था होइन,’ उनले भने, ‘कार्यवाहक सभापति परामर्शमै हुनुहुन्छ।’
विशेष महाधिवेशनबाट चयन भएको केन्द्रीय कार्यसमितिलाई देउवा समूहले अहिलेसम्म स्वीकार गरेको छैन। निर्वाचन आयोगले उक्त कार्यसमितिलाई आधिकारिकता दिएपछि देउवा समूह अन्तरिम आदेश माग गर्दै सर्वोच्च अदालत पुगेको थियो। तर, सर्वोच्च अदालतले देउवा समूहको पक्षमा अन्तरिम आदेश जारी गरेन।
न्यायाधीश सुनिल पोखरेलको इजलासले ६ माघमा निर्वाचन आयोगलाई कारणसहित १५ दिनभित्र लिखित जवाफसहित उपस्थित हुन निर्देशन दिएको छ।
यसअघि विशेष महाधिवेशनमार्फत नयाँ नेतृत्व चयन हुनुअघि, कार्यवाहक सभापति खड्काको अध्यक्षतामा बसेको केन्द्रीय कार्यसमिति बैठकले तत्कालीन महामन्त्रीद्वय गगनकुमार थापा र विश्वप्रकाश शर्मा तथा सहमहामन्त्री फरमुल्लाह मन्सुरलाई पाँच वर्षका लागि साधारण सदस्यसमेत नरहने गरी पार्टीबाट निस्कासन गर्ने निर्णय गरेको थियो।
