बिहीबार कार दुर्घटनामा ज्यान गुमाएका फुटबलर डिएगो जोटा र उनका भाइ आन्द्रे सिल्भाको पोर्चुगलमा अन्त्येष्टि हुँदैछ। उनीहरूको शव पोर्चुगलको गोन्डुमरमा राखिएको छ।
राष्ट्रपतिसहित देशका थुप्रै परिचित व्यक्तित्व समवेदनाका लागि त्यहाँ पुगेका थिए। जोटाका हजुरबा सहित पारिवारिक सदस्यहरू पनि त्यहीँ भेला भएका छन्। पोर्चुगलका हजारौँ स्थानीयहरू त्यहाँ उपस्थित भएका छन्।
पोर्चुगलको राष्ट्रिय झन्डा बोकेर उनका समर्थकहरू अन्तिम बिदाका लागि यस स्थानमा गइरहेका छन्।
पोर्चुगलका राष्ट्रपति मार्सेलो रुबेलो डे सोसा, प्रधानमन्त्री लुइस् मोन्टनेग्रो, राष्ट्रिय टिमका होसे माउटिन्हो, डिएगो डालोट, रिकार्डो हालोट र जोटाका एजेन्ट जर्ज मेन्डेस पनि अन्त्येष्टि कार्यक्रममा पुगेका छन्।
सामान्य शल्यक्रिया भएका कारण विमान चढ्न डराएर उनी लिभरपुल कारमा फर्किरहेका थिए। लिभरपुलले उनको निधन क्लबका लागि अपूरणीय क्षति भएको भन्दै समवेदना व्यक्त गरेको छ।
२८ वर्षीय उनले यसै वर्ष पोर्चुगललाई नेसन्स लिगको उपाधि दिलाएका थिए। साथै उनले लिभरपुललाई इङ्लिस प्रिमियरसिपको उपाधि दिलाएका थिए। एनफिल्डमा पनि समवेदना कार्यक्रम आयोजना भएको थियो। कार्डिफमा बाहिर स्क्रिनमा फोटो राखेर समवेदना व्यक्त गरिएको थियो।
एनफिल्डमै आयोजना गरिएको श्रद्धाञ्जली कार्यक्रममा पनि उनका हजारौँ समर्थक उपस्थित भएका थिए। धेरै उनका समर्थकहरू आफूलाई सम्हाल्न कठिन भइरहेको बताएका छन्। लिभरपुलका स्ट्राइकर मोहम्मद सलाहले आफू केही बोल्न नै नसक्ने अवस्थामा रहेको बताए।
